المساعد الشخصي الرقمي

مشاهدة النسخة كاملة : ++|| تــاريخــك فــي الانتـــرنـــــــت ||++


Charisma
14-02-2014, 03:43 PM
السلام عليكم ورحمه الله وبركاته

في تجوالاتي في المنتدى وخصوصا المواضيع القديمه ( احب انبش فيها ) .
شدني موضوع للاخ الرويــس بعنوان ( للكبار فقط )
رجع لي ذكريات النت وبدايه النت والاحداث اللي رافقت مسيرتنا في الانترنت.
ايام شبكة الخليفي :nice: والاشتراكات فيها .. ايام الساعه بثمانيه ريال والفواتير بالالاف :no:
ايام الاي سي كيو والبالتوك ( سابقا ) .. وايام بطاقات الابحار والصوت الرنان :)
ايام عصر دردشه الجافا وتقعد تزخرف نكك اتقول حنايه .. الى ان رسا الحال فينا للمنتديات.


اقتباس لموضوع الاخ الرويس ويسمح لي :



هل يوجد بيننا (أصحاب زمن جميل ) يحبب للبعض الإلتفاف
حولهم بغرض سماع ( صدى لحظات) أصبحت تذكر على وزن
(كنا نسوي .. كنا نروح .. كنا نلعب ... كنا نضرب أو ننضرب .. كانوا أبهاتنا ..الخ ) ؟

هل فعلا البعض منا هم بمثابة ( شيبان وعجايز ) النت ؟
ومن خلالهم يمكن القول أنهم ( حلقة الوصل الأخيرة ) بين جيل *البداية
الحقيقية للمنتديات في 94 مرورا بـ 97 ومن ثم 99 (أي من شبكة الخليفي و المجالس (كيوكات) - ساحة الحوار (فارس نت ) - منتديات الجلسة( تسكر) ) وجيل ( أحدث منتدى) ؟؟؟




مساحه حره للجميع للمشاركه بتاريخك في الانترنت




كيـــــف بـــدات مـــسيــــرتـك فــي الانــتـــرنــــــــــــت؟

وفــــي اي سنــــه دخــلــت عالـــــــم الانـــتـــرنـــــــت؟

والمـــــــواقع اللـــــــي كنـــــــت تتـــردد عليـــــهــــــا ؟

الاحــــداث اللــــي واجهــتـــهــا في الانـــتـــــرنــــــــت؟

تـــاريخـــــــــــك فــــي بــــرامـــج المـــــحــــــادثـــــــه؟

وتقييمك لها وهــل انـــت مـــعـــهـــــا ام ضـــــدهـــــــا؟

والمــــنـــتــــدى vs الــدردشــــــات .. ايهــما تفضـــل؟

ونصيحه اخيره للمشاركين الجدد في عالم الانــترنــــت؟

اتمنى التفاعل :victory:
نور الحور
14-02-2014, 05:13 PM
موضوعك حلو كابتن .. تسلم على الطرح ..

فيه معلومات اول مرة اعرفها .. اعتبرها توثيق تاريخي هههههه

لي عودة ان شاء الله ..
ضوى
14-02-2014, 05:18 PM
لي عودة بما اني من العصر الديناصوري
بصمة قطرية
14-02-2014, 05:21 PM
حلو الموضوع ..
في اشياء أول مرة أسمع عنها ..
بس لحقت على بطاقات إبحار خخخخخخ
و السمفونسة اللي تطلع لين يشبك ..
أيااااام
نور الحور
15-02-2014, 02:34 AM
عدنا ..:nice:

بالنسبة لي ما كنت متعلقة وايد بالنت ..

بدايتها كانت للايميلات .. وللسيرج ..

بعدها شوي شوي حبيت ادخل منتديات ..

بديت بالمنتديات النسائية السعودية والكويتية والإماراتية ..

حسيت فيها خصوصية .. واستفدت وايد ..

بعدين منتديات التنمية البشرية ..

عقبها سجلت بمنتدانا .. وكنت مقلة بالمشاركات ..

ومن سنة ونص تقريباً صرت مستمرة ومواظبة ...بشغف :shy:

هههههههههه

برامج المحادثات مالي فيها كلش ..

اتابع الفيس بوك وتويتر بس مقلة فيهم جداً .. وأكتفي بالقراءة فقط وليس المشاركة :shy:
توشيبا
15-02-2014, 02:40 AM
بدايتي في النت من عام 1999

كان دخولي فيه عن طريق واحد هكر ومبرمج تدربت علي ايده وصرت احب البرمجه

واحب اشارك في اي شي يخص التنميه البشريه والمواقع حقت البرمجه وتعريب الهاكات

والحمدالله للحين مثل مانا ماتغيرت مبرمج و اعطي دروس في التنميه البشريه في قروبات
ضوى
15-02-2014, 03:12 AM
موضوعك يا بيلوت رجعني 15
سنة ورا ، اول مادش النت بيتنا اقصد بيت اهلي ، اصغر ثنتين في البيت اللي عرفوه ، كل يوم يراووني شي جديد ، اغنية ، بطاقة ، الخ ، وكانت عندهم مجموعة ارقام اخوي يعطيهم يشبكون عليها يعني قبل بطاقة الابحار بوااايد ، وكان ينشغل تلفون البيت باستمرار وامي تزعل ، المهم راوني صورة بنت الله يستر عليها قالوا هذي البنت واحد حاط الايسكيو مالها فوق صورتها ، زعلت عليها وزعلت من اللي سوى هالشي ، سوت لي اختي ايميل عشان المسنجر وعقب سويت حساب لكل شي ايسكيو بالتوك ياهو مسنجر ،،،،الخ ، بس للامانة كنت اسوي سيرج عن الامور الفنية في الكمبيوترات والطب والهندسة ، دخلوا علي اشكثر بس ماكنت اقبل اي احد بنات اشكال والوان ، كنت ادخل برامج الدردشة اللي تكون بالمواقع واحط ايات ذكر واحاديث ويطردوني وبلوك �� وعقب كنت ادور على بطاقات اغاني وخرابيط ، واشتركت في قروبااات كثيرة اشهرها بذاك الوقت قروب بو نواف ، وعقب دخلوا لنا النت الشغل وصار شغلنا متطور وتميت اطور نفسي بنفسي ماخذت ولا دورة واحدة في الكمبيوتر كل شي عرفته بجهد شخصي لدرجةلما درست في معهد التنمية مادة الحاسوب كنت متفوقة جدا جدا والكل ظن انه عندي دورات في الحاسب ، والحمد لله حتى صيانة الاجهزة عرفتها كنت اصلح الاجهزة طبعا العطل اللي بسبب خيارات خطأ او حذف برامج ،
طبعا صادفت اشكال والوان من البشر شي تعرفت عليهم من مواقع التواصل وشي بشكل مباشر اثناء الاجتماعات والمؤتمرات والقمم اللي صارت ، بس بجد الحين صار النت يخوف جدا ، يوم دخلنا النت كنا يهال بس عاقلين الحين يهال وخفيفين عقل شي يخوف

مايحتاج انصح الجدد ليش عاد فيه جدد بهالعصر ؟!!
Charisma
15-02-2014, 03:19 AM
راجع لكم ان شاءالله فرد فرد
بس لاتنسون الاساله المطروحه
ونبي تفاعل
Charisma
15-02-2014, 04:14 PM
عدنا ..:nice:

بالنسبة لي ما كنت متعلقة وايد بالنت ..

بدايتها كانت للايميلات .. وللسيرج ..

بعدها شوي شوي حبيت ادخل منتديات ..

بديت بالمنتديات النسائية السعودية والكويتية والإماراتية ..

حسيت فيها خصوصية .. واستفدت وايد ..

بعدين منتديات التنمية البشرية ..

عقبها سجلت بمنتدانا .. وكنت مقلة بالمشاركات ..

ومن سنة ونص تقريباً صرت مستمرة ومواظبة ...بشغف :shy:

هههههههههه

برامج المحادثات مالي فيها كلش ..

اتابع الفيس بوك وتويتر بس مقلة فيهم جداً .. وأكتفي بالقراءة فقط وليس المشاركة :shy:

مرحبا اختي نور ..


عالم الانترنت عالم كبير وفيه من الذكريات والاحداث اللي ماتنسي .. خصوصا للي ادخلوا هالعالم من 10 سنين وزود ( مثل الاخت ضوى )
اذكر مثلا بدايتي في الكمبيوتر كانت في بداية التسعينات وكنا قبلها صغار وفينا فضول لهالكمبيوتر ابتداءا من ويندوز 3 وويندوز 95 98 وميلنيوم
ولاننسى برامج شركة صخر .. مثل برامج الاسره ( ذكريات )

http://www.galele.com/vb/images/imgcache/2009/09/131.jpg

بدايتي في الانترنت كانت في الـ98 شفت الوالد يدخل عالانترنت ويتصفح ايامها موقع ( افضل مئه موقع عربي ) وبرامج ومنتديات وردود
جذبني هالشي وبديت بس بتنزيل البرامج ( ريل بلير عشان ينزل يومها يبيله ساعتين ونص اذا حظك حلو كل هذا لعيون الخروف اللي يرقص ) الين ماتطور الموضوع بين الربع
وخبرونا عن شبكه اسمها الخليفي شبكة محليه وباشتراكات كان فيها قسم للبرامج وقسم للدردشه ونفس المنتدى بس كانت ايام حلوه واغلب
المشاركين يعرفون بعض خارج الموقع .. الين مادخلنا عالم الايسيكيو والبالتوك والمسنجر ومع بداية الالفين عصر الشات ( الجافا ) ايام الديوان ( رعودي )
وايام كازا وعلي بابا .. والذكريات في رعودي ماتنسي كان روم واحد وحّده 60 شخص( وخذلك الزحمه تنطر احد يطلع ) .. ونظام احزاب وكل هذا
الين مابدت الدردشات القطريه تنتشر .. شات الدوحه وانا قطري وقطر .. وانتهى مع قطر ..
دخلنا عالم التصميم ( قبل كان عالبور بوينت ) 2002 وتطور الموضوع للسويتش والفلاش وصرت استمتع بتصميمات وللحين منشوره في بعض المواقع واستمريت
في التصميم الين 2008 وبعدها بنشرنا ماعاد في وقت ولا في حماس مثل قبل لمثل هالامور .
الدردشات اقدر اقول اهي الجاذب الرئيسي لي في الانترنت وعلى ذيك الايام الدردشه غير عن الحين .. ناس عاقله تدخل ونقاشاتها مفيده وفيها من المواقف الطريفه ..
لكن من بعد الـ2007 هالمجال صار مشبوه كلام فاضي وسب وبلاوي ( اعتقد لان الانترنت انتشر وصارت كل الفئات العمريه تدخله ) .

تركنا الدردشات واستمرينا على المسنجر وانتقلنا لعالم المنتديات ماكنت اشارك الا في منتديات قطريه وهي معدوده عالاصابع ( المعروفه ) ومنتديات تقنيه .
واستقر الحال فيني بمنتدى الاسهم القطريه لاني لاحظت انه يشمل كل شيء ويوافينا باخبار الديره اول باول والنقاشات فيه مفيده .. لكن لاحظت في الفتره الاخيره
قلة المشاركات واختفاء الاعضاء القدامى .

وبصراحه انا استفدت امور كثيره من الانترنت .. في حياتي الخاصه سواء الاجتماعيه او العمليه .

يعطيج العافيه اخت نور وشاكر لج مشاركتج
Charisma
15-02-2014, 04:15 PM
بدايتي في النت من عام 1999

كان دخولي فيه عن طريق واحد هكر ومبرمج تدربت علي ايده وصرت احب البرمجه

واحب اشارك في اي شي يخص التنميه البشريه والمواقع حقت البرمجه وتعريب الهاكات

والحمدالله للحين مثل مانا ماتغيرت مبرمج و اعطي دروس في التنميه البشريه في قروبات

مرحبا اخوي اتش بي ..

اوه من ربع الساب سفن انت وضبط لك باتش وادمجه مع صورة ودور بورت مفتوح واقلب الشاشه عليه وطلع له السيدي روم هههههه
عسى الله يوفقك ياخوي اتش بي .. عالم البرمجه عالم جميل خضته بشكل سطحي بالنسبه للكمبيوتر وتعمقت فيه بالنسبه للجوال
اذكر كانت في حركه على ايام البرق ADSL اذا زادت الفاتوره واقطعوا عليك الخط .. كنا نغير التاريخ ويرد يشبك بس عقب وقفوها
اتم متلفت بدون نت .. لا وربعك شابكين وناطرينك .. وصج لي قالوا ( الحاجه ام الاختراع )
يظل الانترنت عالم جدا رائع ومفيد للي يعرف يستخدمه ويضبط نفسه . بس بصراحه قولي .. بشنو استخدمت برامج الهاكنج ؟

ويعطيك العافيه اخوي اتش بي عالمشاركه .:nice:
Charisma
15-02-2014, 04:17 PM
موضوعك يا بيلوت رجعني 15
سنة ورا ، اول مادش النت بيتنا اقصد بيت اهلي ، اصغر ثنتين في البيت اللي عرفوه ، كل يوم يراووني شي جديد ، اغنية ، بطاقة ، الخ ، وكانت عندهم مجموعة ارقام اخوي يعطيهم يشبكون عليها يعني قبل بطاقة الابحار بوااايد ، وكان ينشغل تلفون البيت باستمرار وامي تزعل ، المهم راوني صورة بنت الله يستر عليها قالوا هذي البنت واحد حاط الايسكيو مالها فوق صورتها ، زعلت عليها وزعلت من اللي سوى هالشي ، سوت لي اختي ايميل عشان المسنجر وعقب سويت حساب لكل شي ايسكيو بالتوك ياهو مسنجر ،،،،الخ ، بس للامانة كنت اسوي سيرج عن الامور الفنية في الكمبيوترات والطب والهندسة ، دخلوا علي اشكثر بس ماكنت اقبل اي احد بنات اشكال والوان ، كنت ادخل برامج الدردشة اللي تكون بالمواقع واحط ايات ذكر واحاديث ويطردوني وبلوك ï؟½ï؟½ وعقب كنت ادور على بطاقات اغاني وخرابيط ، واشتركت في قروبااات كثيرة اشهرها بذاك الوقت قروب بو نواف ، وعقب دخلوا لنا النت الشغل وصار شغلنا متطور وتميت اطور نفسي بنفسي ماخذت ولا دورة واحدة في الكمبيوتر كل شي عرفته بجهد شخصي لدرجةلما درست في معهد التنمية مادة الحاسوب كنت متفوقة جدا جدا والكل ظن انه عندي دورات في الحاسب ، والحمد لله حتى صيانة الاجهزة عرفتها كنت اصلح الاجهزة طبعا العطل اللي بسبب خيارات خطأ او حذف برامج ،
طبعا صادفت اشكال والوان من البشر شي تعرفت عليهم من مواقع التواصل وشي بشكل مباشر اثناء الاجتماعات والمؤتمرات والقمم اللي صارت ، بس بجد الحين صار النت يخوف جدا ، يوم دخلنا النت كنا يهال بس عاقلين الحين يهال وخفيفين عقل شي يخوف

مايحتاج انصح الجدد ليش عاد فيه جدد بهالعصر ؟!!

مرحبا اختي ضوى ..ماشاءالله .. انتي فعلا من العصر الديناصوري ..

ذكرتيني بموضوع انشغال خط البيت .. (بووة خذلك انواع الزف ) .. 166 -161 السبب ..
وبالنسبه لموضوع الفضايح فهذي من ضعاف النفوس ومن قلة وعي بالنسبه للبنات وكانت تحصل وهالشيء كان مرفوض ومستنكر
ومع الالفيه زادت هالامور لان مثل ماقلت صار الانترنت يدخله الصغير قبل الكبير .. لكن قبل كان مقصور على فئات عمريه واغلبهم فوق الـ18
(اي الساعه بثمانيه ريال .. عبالك الموضوع لعبه ).. وبالنسبه للكمبيوتر وتعديله انا كنت اخذ الموضوع تحدي يا انا يالكمبيوتر ياتشتغل يا تتكسر على يدي
وماخفيكم ان عانى من اكثر من شوته وبكس بس ولله الحمد الفضل لله ثم جارنا .. كان يعلمني شلون افرمت الكمبيوتر وقتها ايام تدخل الدوس
كل يومين مودي له الكمبيوتر بعز الظهر طاق الجرس وانطر . ( شكله تحسف انه علمني ) بالنسبه لي انتهى عصر الويندوز واستقريت على ماك من 2006
على طاري الدردشات .. كان سم ضروسي ( الفلودات ) يخنق الكمبيوتر عندي لين مايدخن .

عسى ربي يوفقج اخت ضوى وشاكر لج مشاركتج
Charisma
15-02-2014, 04:18 PM
حلو الموضوع ..
في اشياء أول مرة أسمع عنها ..
بس لحقت على بطاقات إبحار خخخخخخ
و السمفونسة اللي تطلع لين يشبك ..
أيااااام

في انتظارج اخت بصمه .. وايضا الاربع تذاكر في الانتظار ههههه
(Sara)
15-02-2014, 04:42 PM
راجع لكم ان شاءالله فرد فرد
بس لاتنسون الاساله المطروحه
ونبي تفاعل

الاساله = الاسئله :telephone:
بصمة قطرية
15-02-2014, 04:49 PM
في انتظارج اخت بصمه .. وايضا الاربع تذاكر في الانتظار ههههه

ماشاءالله زادوا صاروا أربع
الله يزيد و يبارك :ok::ok:


بديت أستخدم النت تقريباً سنة 2002
أذكر يوم خذت الكمبيوتر كنت داخله دورة تعليم الكمبيوتر
عشان الوظيفة ..
تدربت لإمتحان نظري و أنا إحاول أتذكر اللي طبقته
و كنت إذا توهقت كلمت المدربة
قالت لي شلون بتمتحنين بكرة و إنتي ما عندج كمبيوتر
شلون درستي ..؟؟
الحمدلله كنت الأولى على الدفعه نقصت نص درجة بس :rolleyes2:
99,5 %
عقب ما خلصت الدورة بوالعيال جاب لي الكمبيوتر
بديت من وقتها أدخل النت و إستخدمه غالباً كنت مع المنتديات
المنتديات النسائية أكثر شي
أزياء طبخ سوالف بنات ،،،
من كم سنه بديت مجال الكتابة
كتابة الخواطر و كنت أنزل مواضيع خاصه بالطبخ و الأزياء
لا لي بالفيس بوك و لا تويتر
حدي بس منتدى و حالياً بس مشاركة في هالمنتدى ..
(Sara)
15-02-2014, 04:55 PM
كيـــــف بـــدات مـــسيــــرتـك فــي الانــتـــرنــــــــــــت؟
في المدرسه في مادة الحاسوب ^^
وفــــي اي سنــــه دخــلــت عالـــــــم الانـــتـــرنـــــــت؟
2007 :shy:

والمـــــــواقع اللـــــــي كنـــــــت تتـــردد عليـــــهــــــا ؟
عروس قطر & منتدى قبيلتي :shy:
الاحــــداث اللــــي واجهــتـــهــا في الانـــتـــــرنــــــــت؟
ولا شي كنت ادخل عليه اكثر شي للبحث عن اي شي ابيه :nice:
تـــاريخـــــــــــك فــــي بــــرامـــج المـــــحــــــادثـــــــه؟
البرامج المحادثه اللي استخدمته تويتر والاستقرام في بداية 2012 :victory:
وتقييمك لها وهــل انـــت مـــعـــهـــــا ام ضـــــدهـــــــا؟
محايده :victory:
والمــــنـــتــــدى vs الــدردشــــــات .. ايهــما تفضـــل؟
مافهمت السؤال :secret:
ونصيحه اخيره للمشاركين الجدد في عالم الانــترنــــت؟
وما يلفظ من قول الا لدية رقيب حسيب

جاوبت في تذاكر :oops:
الدمعه
15-02-2014, 05:04 PM
بدايتي كانت في 97 اظن ،،، ايام كنا نشارك ببطاقه وبعدين امي جزاها الله خير ركبت لنا تلفون خاص حق النت ،،، بس بصراحه ما اتذكر اسم اي شي،،،،

المهم اني كنت ادخل النت واسوي ابحاث الثانويه عليه واطبعهم واكشخ فيهم انهم من النت ههههههه

الحمدلله والشكر ،،، تعلمت شلون استخدم الميكروسوفت وفوتوشوب من النت ،،، واستفدت منه للمدرسة ،،

دخلت دردشات سعوديه وقطريه ،،، ،،، لين اكتشفت قروب في الدردشه ديني وتابعت معاهم وتعرفت على صاحبه القروب اماراتيه وللحين ربع ،،،

وسجلت في منتديات اماراتيه وكويتيه وسعوديه ،،، اغلبها نسائيه وكانت لي مشاركات ومواضيع وايد ،،، وكنت مشرفة قسم في اكثر من منتدى ،،، وفي منتدى خاص لتعليم الخياطه ،بس مادري وشو جنسيته هههههه

اخر شي سجلت في منتديات قطرية واستقريت على منتدى الاسهم ،،، وصرت امر على باقي المنتديات في الشهرين او اكثر مره ،،،

وايد استفدت من النت ،،، بس اللحين ابد ماعندي وقت لاي شي ،،، يدوبي ادخل هالمنتدى وبس ،،

اللحين طبعا لازم نواكب التطور ونتعرف على كل الانواع عشان نتابع عيالنا ،،،
وطن
15-02-2014, 05:27 PM
حد قال فري تل
رجل الجزيرة
15-02-2014, 09:38 PM
حد يتذكر كان الإنترنت ب 10 ريالات لدقيقة الوحدة وكانت السرعة 28000 بت.
الزعفراني
15-02-2014, 10:04 PM
حد قال فري تل

كح كح غبار .. فري تل والام ار سي
الزعفراني
15-02-2014, 10:04 PM
من كان يشبك النت بباسوردات مستشفى حمد وقطر غاز ؟؟ اعترفوا
Charisma
15-02-2014, 10:55 PM
ماشاءالله زادوا صاروا أربع
الله يزيد و يبارك :ok::ok:


بديت أستخدم النت تقريباً سنة 2002
أذكر يوم خذت الكمبيوتر كنت داخله دورة تعليم الكمبيوتر
عشان الوظيفة ..
تدربت لإمتحان نظري و أنا إحاول أتذكر اللي طبقته
و كنت إذا توهقت كلمت المدربة
قالت لي شلون بتمتحنين بكرة و إنتي ما عندج كمبيوتر
شلون درستي ..؟؟
الحمدلله كنت الأولى على الدفعه نقصت نص درجة بس :rolleyes2:
99,5 %
عقب ما خلصت الدورة بوالعيال جاب لي الكمبيوتر
بديت من وقتها أدخل النت و إستخدمه غالباً كنت مع المنتديات
المنتديات النسائية أكثر شي
أزياء طبخ سوالف بنات ،،،
من كم سنه بديت مجال الكتابة
كتابة الخواطر و كنت أنزل مواضيع خاصه بالطبخ و الأزياء
لا لي بالفيس بوك و لا تويتر
حدي بس منتدى و حالياً بس مشاركة في هالمنتدى ..

مرحبا اختي بصمه ..

ماشاءالله يعني خبيره كمبيوتر .. واحسن مافي الموضوع ان مالج لا بالفيس بوك ولا تويتر
اكرة موقعين عندي .. ماخلوا شي للخصوصيه الواحد ناشر كل تفاصيل حياته اليوميه

يعطيج العافيه عالمشاركه خيتو
Charisma
15-02-2014, 10:59 PM
الاساله = الاسئله :telephone:


كيـــــف بـــدات مـــسيــــرتـك فــي الانــتـــرنــــــــــــت؟
في المدرسه في مادة الحاسوب ^^
وفــــي اي سنــــه دخــلــت عالـــــــم الانـــتـــرنـــــــت؟
2007 :shy:

والمـــــــواقع اللـــــــي كنـــــــت تتـــردد عليـــــهــــــا ؟
عروس قطر & منتدى قبيلتي :shy:
الاحــــداث اللــــي واجهــتـــهــا في الانـــتـــــرنــــــــت؟
ولا شي كنت ادخل عليه اكثر شي للبحث عن اي شي ابيه :nice:
تـــاريخـــــــــــك فــــي بــــرامـــج المـــــحــــــادثـــــــه؟
البرامج المحادثه اللي استخدمته تويتر والاستقرام في بداية 2012 :victory:
وتقييمك لها وهــل انـــت مـــعـــهـــــا ام ضـــــدهـــــــا؟
محايده :victory:
والمــــنـــتــــدى vs الــدردشــــــات .. ايهــما تفضـــل؟
مافهمت السؤال :secret:
ونصيحه اخيره للمشاركين الجدد في عالم الانــترنــــت؟
وما يلفظ من قول الا لدية رقيب حسيب
المفروض ( عتيد )
جاوبت في تذاكر :oops:

مرحبا اختي سارا ..

بتنشبين .. بننشب :omen2: راجعي التعديلات بالعنابي

ماشاءالله الله يوفقج اختي من 2007 ماعاصرتي اللي عاصروه الاغلبيه
وبسؤالي كنت اقصد المنتديات والدردشات .. وين الافضل ..
وبالنسبه للتذاكر .. في تذكرتين لعلاء الدين :nice:
Charisma
15-02-2014, 11:04 PM
بدايتي كانت في 97 اظن ،،، ايام كنا نشارك ببطاقه وبعدين امي جزاها الله خير ركبت لنا تلفون خاص حق النت ،،، بس بصراحه ما اتذكر اسم اي شي،،،،

المهم اني كنت ادخل النت واسوي ابحاث الثانويه عليه واطبعهم واكشخ فيهم انهم من النت ههههههه

الحمدلله والشكر ،،، تعلمت شلون استخدم الميكروسوفت وفوتوشوب من النت ،،، واستفدت منه للمدرسة ،،

دخلت دردشات سعوديه وقطريه ،،، ،،، لين اكتشفت قروب في الدردشه ديني وتابعت معاهم وتعرفت على صاحبه القروب اماراتيه وللحين ربع ،،،

وسجلت في منتديات اماراتيه وكويتيه وسعوديه ،،، اغلبها نسائيه وكانت لي مشاركات ومواضيع وايد ،،، وكنت مشرفة قسم في اكثر من منتدى ،،، وفي منتدى خاص لتعليم الخياطه ،بس مادري وشو جنسيته هههههه

اخر شي سجلت في منتديات قطرية واستقريت على منتدى الاسهم ،،، وصرت امر على باقي المنتديات في الشهرين او اكثر مره ،،،

وايد استفدت من النت ،،، بس اللحين ابد ماعندي وقت لاي شي ،،، يدوبي ادخل هالمنتدى وبس ،،

اللحين طبعا لازم نواكب التطور ونتعرف على كل الانواع عشان نتابع عيالنا ،،،



مرحبا اختي الدمعه ..

الله على ذيك الايام .. تسوي البحث وتنطر الطابعه ( خمس دقايق عشان ورقه وتحاتي الحبر لايخلص )
ومثل ماقلتي كبرنا واكبرت المشاغل ويانا والظاهر ان كل عضو في هالمنتدى عنده خلفيات كبيره في عالم النت
مثل اللي كان مشرف في منتديات اخرى او من كان يملك موقع ومراقبين في دردشات .. الخ
وبالاخير تجمعنا في مكان واحد ( الاسهم القطريه )

ربي يوفقج اختي
Charisma
15-02-2014, 11:05 PM
حد قال فري تل




كح كح غبار .. فري تل والام ار سي

ليكون هالبرنامج اللي كنا نشتري له كوبونات من السوفتيل عشان الاتصالات الخارجيه ؟
Charisma
15-02-2014, 11:08 PM
حد يتذكر كان الإنترنت ب 10 ريالات لدقيقة الوحدة وكانت السرعة 28000 بت.

اذكر السرعه كانت مثل ماذكرت .. بس الساعه بعشر اخبر للي مب مشتركين على 161 *وبالساعه مب بالدقيقه

اما بالدقيقه عشر .. عز الله فلسنا . بانتظار مشاركه لتاريخك ياخوي رجل الجزيره شكلك من المحاربين القدامى :victory:


من كان يشبك النت بباسوردات مستشفى حمد وقطر غاز ؟؟ اعترفوا

هههههه

بصراحه ماعمري جربتها .. شكلك كنت محللهم !
بانتظار مشاركتك بتاريخك في النت يالزعفراني :victory:
القبطان سلفر
16-02-2014, 01:19 AM
في بداية تعرفي على الكمبيوتر لم اكن اعير له اهتمام وكان ذلك قبل بداية الوندوز حيث كان التعامل معه صعب ويحتاج الى تعلم لغة الدوس ولم يكن به جرافيك والشاشة تقريبا سوداء .وبعد ظهور الوندوز انتشر بين الناس وانا من ضمنهم حيث سهولة التعامل مع الكمبيوتر جعلته مستساغ للجميع .

واذكر اول كمبيوتر كان في سنة 1997 بسعة 2 ونصف غيغا وكانت تلك السعة مبالغ فيها على قول صديقي الخبير الذي اختار لي مواصفاته !!
وكانت البرامج المشهور في تلك الايام ( الفريتل) للشات ومنتدى قطري (نسيت اسمة ) كان مشهور في وقته . وللتواصل كان ( ICQ ) ومن ذلك الوقت جهزت سفينتي للابحار في هذا العالم الافتراضي الجديد . وجبت سواحله وأمضيت الساعات حتى الصباح مشدوها ومتعجب مما يحويه ومبهور من شواطئه العشوائية التي ارسي عليها .

حتى رست سفينتي بعد تلك السنين الطوال في غربة البحار الافتراضيه في منتدى الاسهم القطرية وهو المنتدى الوحيد القطري الذي شاركت به واشارك الان .
اما الان فهناك برامج مهمة لا يخلو منها جوالي منها اللاين والبي بي م والواتس اب. بالاظافة الى برامج تحرير الصور وخرائط غوغل والانستغرام وغيرها من البرامج الضرورية للجوال .

يعطيك العافية ايها الطيار على طرحك هذا الموضوع :nice:
وطن
16-02-2014, 08:38 AM
ليكون هالبرنامج اللي كنا نشتري له كوبونات من السوفتيل عشان الاتصالات الخارجيه ؟

لا ما تشتري له شي هالبرنامج
مجاني

هو والاي ار سي

بدايتي كانت مع النت في 95-96
في محركات البحث
في 97 تعرفت ع الايميل و على الفري تل و الاي ار سي
و وراهم الاي سي كيو

و أول منتدى سجلت فيه هو كويت تشات في التسعينات بعد
و بعدها منتديات عروس و شموخ





في بداية تعرفي على الكمبيوتر لم اكن اعير له اهتمام وكان ذلك قبل بداية الوندوز حيث كان التعامل معه صعب ويحتاج الى تعلم لغة الدوس ولم يكن به جرافيك والشاشة تقريبا سوداء .وبعد ظهور الوندوز انتشر بين الناس وانا من ضمنهم حيث سهولة التعامل مع الكمبيوتر جعلته مستساغ للجميع .

واذكر اول كمبيوتر كان في سنة 1997 بسعة 2 ونصف غيغا وكانت تلك السعة مبالغ فيها على قول صديقي الخبير الذي اختار لي مواصفاته !!
وكانت البرامج المشهور في تلك الايام ( الفريتل) للشات ومنتدى قطري (نسيت اسمة ) كان مشهور في وقته . وللتواصل كان ( ICQ ) ومن ذلك الوقت جهزت سفينتي للابحار في هذا العالم الافتراضي الجديد . وجبت سواحله وأمضيت الساعات حتى الصباح مشدوها ومتعجب مما يحويه ومبهور من شواطئه العشوائية التي ارسي عليها .

حتى رست سفينتي بعد تلك السنين الطوال في غربة البحار الافتراضيه في منتدى الاسهم القطرية وهو المنتدى الوحيد القطري الذي شاركت به واشارك الان .
اما الان فهناك برامج مهمة لا يخلو منها جوالي منها اللاين والبي بي م والواتس اب. بالاظافة الى برامج تحرير الصور وخرائط غوغل والانستغرام وغيرها من البرامج الضرورية للجوال .

يعطيك العافية ايها الطيار على طرحك هذا الموضوع :nice:

منتدى شموخ ؟!
او غيره ؟
حمد 2002
16-02-2014, 12:21 PM
بدايه دخولي لعالم النجوميه والاضواء بمنتدى شبكه الاسهم القطريه هو هذا الموضوع
http://www.al-watan.com/viewnews.aspx?n=ED32D67D-6E27-4C11-8AD3-AFE93A9F29CB&d=20130220
المحاميه
16-02-2014, 02:51 PM
حمد شلون ناشرين موضوعك هههه
حتى انا ماعرف اسوي كرك بس عادي باجرب عليك
كان فيه وخلص
16-02-2014, 08:40 PM
السلام عليكم
موضوع جيمل أعاد لنا تاريخ اجمل
وللإجابة على الأسئلة

كيـــــف بـــدات مـــسيــــرتـك فــي الانــتـــرنــــــــــــت؟
بدأت عندما واحد من الشباب قالي تعال نروح مقهى للنت ، ودخل برنامج محادثه كان شاشته لونها أسود ، وكانت بالإنجليزي ، بس ما عجبني
وبعدها أشتريت كمبيوتر متطور اخر شي كان نازل في السوق ، وكان سعته 2 غيغا ، :secret: وكان ثمنه للحين أذكره 5500ريال شراكة مع أخواني
وأذكر كان الفلاشات 200 ميغا 300 أو 400ريال

وفــــي اي سنــــه دخــلــت عالـــــــم الانـــتـــرنـــــــت؟
أتوقع في سنة الـ 96 أو ال97
والمـــــــواقع اللـــــــي كنـــــــت تتـــردد عليـــــهــــــا ؟
صراحه ما كان يعجبني شي غير شبكة الخليفي ، كانت غايه في الروعه ، وكانت متعه حقيقية ، الله يسهل عليهم ،
الاحــــداث اللــــي واجهــتـــهــا في الانـــتـــــرنــــــــت؟
أهم الأحداث اللي لله الحمد أني ما تورط فيها وما أدري كيف الناس راح تقف أمام ربها يوم القيامه للي كانوا يدخلوا النت بحسابات غيرهم ، وكنت لما أروح ادفع بكيوتل السد أشوف ناس شياب مصدومين من الفواتير الهائلة من أستخدام النت كانت أرقامهم السرية مسروقه ويستعملها يمكن الف واحد ،
تـــاريخـــــــــــك فــــي بــــرامـــج المـــــحــــــادثـــــــه؟
شبكة الخليفي أول الأمر ، ثم أنتقلت للعالمية في الياهو ماسنجر بس لما كانوا يعرفون أني رجل :weeping: ما كان احد يعطيني وجه ، بس كنت أجري محادثات ممتعه قليله
والسنه الماضية جربت البال توك ، وما عجبني فيها إلا غرف المناظرات ، ولكنه ممل وفيه ناس ما عندهم سالفه وتركت هذا الموقع
وتقييمك لها وهــل انـــت مـــعـــهـــــا ام ضـــــدهـــــــا؟
والله أشوف المفسده أكثر من المصلحه
والمــــنـــتــــدى vs الــدردشــــــات .. ايهــما تفضـــل؟
المنتديات والرقابه أفضل من ترك الحبل على الغارب
ونصيحه اخيره للمشاركين الجدد في عالم الانــترنــــت؟
لا تهتك سترا ، ولا تفضح أحدا ... . فكما تدين تدان ،
وشكرا على الموضوع اللي فعلا الواحد يحس نفسه قديم
أخوكم
كان فيه وخلص ،،، ،
القبطان سلفر
16-02-2014, 10:33 PM
منتدى شموخ ؟!
او غيره ؟


هلا وطن

لا اذكره جيدا . احتمال يكون هذا هو المنتدى :)
بوخالد911
16-02-2014, 11:11 PM
متاااابع
بصمة قطرية
16-02-2014, 11:20 PM
ما يصير تتابع بس بوخالد
لازم تشارك و لا الطيار بيزعل ..!!
Dana’1
17-02-2014, 05:43 AM
يااه موضعك ردني 15 سنه علاقتي بالأجهزة والكمبيوتر قديمة بقدم الأتاري وكمبيوتر صخر لعبه الحروف ووالقصر ( Castle Excellent) هذا بالثمانيات وكان اللعب له ساعات مخصصه
ودخلت عالم النت بالتسعينات وغالب الظن 1999 وكنت أدخل بعض مواقع الكروت الفلاشيه ... الصوتيات والتصاميم
وبرنامج الدردشة الشهيرmIRC وقتها أجانب حيث تلاقي فايدة بالحديث معهم تعرف عنهم وتعرفهم على العرب والأسلام والمسلمين كان أكثرهم من اللاتين والأمريكان


البالتوك رغم شهرته الأ إني ماحبيته ولا أذكر حتى إني دخلته ممكن دخلت الواجة الرئيسيه للبرنامج ماحبيته كلش

أما الدردشه الي تجي بالمواقع والمنتديات دخلتها بس ماحبيتها مبزرة سباب وعلوم مخيسه ولاهي حلوه حتى بالتصميم !!فماعاد دخلت لها كلش هي الثانيه

بعدين إنشغلت بالدراسه وبمشروع التخرج الخاص ببرنامج الفيجوال بيسك وكان عن جزء عم تلاوة وتفسير وترجمة بالإنجليزي
وأيضا برمجة السي بلس والتصميم بالفوتو شوب
وهالكلام في الألفيه والشغل كان بويندوز 2000 و ملينيوم وجهازي من شركة leo أبيض
للحين موجود عند أهلي.. بالمستودع:)
ما علينا
نرجع للنت. بطاقتنا كانت أول نت وفيه غيرها بس نسيت الأسماء..
إشتركت بكذا منتدى تقريبا 3 أو 4 بس مشاركاتي قلييله ..مثل منتديات المشاغب فيما يخص الكمبيوتر والبرامج والتصميم
فيه منتدى جدة غير بس غير عن المتواجد حاليا له نفس الأسم بس
وفيه شبكة أنا المسلم أيضا غير الموجودة حاليا..أذكر وقت أحداث 11سبتمبر كان هالموقع نشيط في نقل بعض الأمور
وأكثر شي لفت إنتباهي وللحين أدور عليه بس أختفى تقول مالها وجود!!...هي قصة أبو عبدالله المسلم أو عبدالله المسلم وكان فيه صور له
والسبب هي قصته المشوقه والمؤثرة كيف كان يهودي وتعلم كل الأمور العسكريه في إسرائيل..ولأن عندة جنسيه بريطانيه فكان يدخل للدول العربه وإلي غيرت في مجرى حياته هي أحداث في مصر وأحداث في قطر وأسلم في قطر وراح بعدها للشيشان لنقل تبرعات أهل قطر وإستقر فيها للجهاد مع أخوانه بالشيشان والأجمل هو إن أخته طبيبه وبعد أسلمت وخدمت بالشيشان :)
هذي بختصار القصة طوووويله فيها أحداث كثيييرة مشوقه ورائعه ..أعرف مو وقته بس تذكرتها وحبيت أشاركها معكم:)

المهم قضيت وقتي بالقراءه في مجالات مختلفة وإستفدت الكثير ولله الحمد والمنه وبعد إستخدمته في الترفيه والألعاب الفلاشيه منها أؤ الألعاب مثل التريفيان والبليارد
بس مو دايم ولا بشكل مستمر حتى....ولي سنوااات مالعبتها!

شكرا لك عالموضوع الرائع:victory:
Charisma
18-02-2014, 01:24 PM
في بداية تعرفي على الكمبيوتر لم اكن اعير له اهتمام وكان ذلك قبل بداية الوندوز حيث كان التعامل معه صعب ويحتاج الى تعلم لغة الدوس ولم يكن به جرافيك والشاشة تقريبا سوداء .وبعد ظهور الوندوز انتشر بين الناس وانا من ضمنهم حيث سهولة التعامل مع الكمبيوتر جعلته مستساغ للجميع .

واذكر اول كمبيوتر كان في سنة 1997 بسعة 2 ونصف غيغا وكانت تلك السعة مبالغ فيها على قول صديقي الخبير الذي اختار لي مواصفاته !!
وكانت البرامج المشهور في تلك الايام ( الفريتل) للشات ومنتدى قطري (نسيت اسمة ) كان مشهور في وقته . وللتواصل كان ( ICQ ) ومن ذلك الوقت جهزت سفينتي للابحار في هذا العالم الافتراضي الجديد . وجبت سواحله وأمضيت الساعات حتى الصباح مشدوها ومتعجب مما يحويه ومبهور من شواطئه العشوائية التي ارسي عليها .

حتى رست سفينتي بعد تلك السنين الطوال في غربة البحار الافتراضيه في منتدى الاسهم القطرية وهو المنتدى الوحيد القطري الذي شاركت به واشارك الان .
اما الان فهناك برامج مهمة لا يخلو منها جوالي منها اللاين والبي بي م والواتس اب. بالاظافة الى برامج تحرير الصور وخرائط غوغل والانستغرام وغيرها من البرامج الضرورية للجوال .

يعطيك العافية ايها الطيار على طرحك هذا الموضوع :nice:

مرحبا بالقبطان ..

ماشاءالله عاصرت الايام الحلوة في بداية النت .. بس غريبه ماسجلت في شبكة الخليفي ؟<< متصيد لاعضائها
اهم شي الكمبيوتر عادك محتفظ فيه ولا ؟ ( عن نفسي كل كمبيوتراتي في الاستور ) الله على ايام القرقعه وبداية التشغيل
تقول مشغل هلكوبتر ..
مثل ماتفضلت منتدى الاسهم المرسى الاخير لاغلب رواد النت في ذاك الزمان . وانا متاكد ان بعض الاعضاء التقينا فيهم
بمواقع او منتديات او دردشات اخرى ( وقتها ) تحت اسامي مستعاره مختلفه ..

تشرفت بمشاركتك ( ايها ) القبطان :nice:
Charisma
18-02-2014, 01:27 PM
لا ما تشتري له شي هالبرنامج
مجاني

هو والاي ار سي

بدايتي كانت مع النت في 95-96
في محركات البحث
في 97 تعرفت ع الايميل و على الفري تل و الاي ار سي
و وراهم الاي سي كيو

و أول منتدى سجلت فيه هو كويت تشات في التسعينات بعد
و بعدها منتديات عروس و شموخ








مرحبا اختي وطن ..

اشتبهت علي البرامج .. بس الفريتل من اسمه ذكرني ببرنامج اتصال دولي كنا ناخذ له كوبونات من السوفتيل وكانت الاتصالات باسعار رمزيه وقتها
Charisma
18-02-2014, 01:30 PM
بدايه دخولي لعالم النجوميه والاضواء بمنتدى شبكه الاسهم القطريه هو هذا الموضوع
http://www.al-watan.com/viewnews.aspx?n=ED32D67D-6E27-4C11-8AD3-AFE93A9F29CB&d=20130220

احيي فيك روح التصيد يا اخ حمد .. ماشاءالله ماخليت صغيره ولاكبيره في مجتمعنا الا وسدحتها بموضوع وشعللته:nice:
انت المفروض ينزل عدد خاص فيك كل اسبوع ( ملحق ) مع الجريده :victory:
Charisma
18-02-2014, 01:36 PM
السلام عليكم
موضوع جيمل أعاد لنا تاريخ اجمل
وللإجابة على الأسئلة

كيـــــف بـــدات مـــسيــــرتـك فــي الانــتـــرنــــــــــــت؟
بدأت عندما واحد من الشباب قالي تعال نروح مقهى للنت ، ودخل برنامج محادثه كان شاشته لونها أسود ، وكانت بالإنجليزي ، بس ما عجبني
وبعدها أشتريت كمبيوتر متطور اخر شي كان نازل في السوق ، وكان سعته 2 غيغا ، :secret: وكان ثمنه للحين أذكره 5500ريال شراكة مع أخواني
وأذكر كان الفلاشات 200 ميغا 300 أو 400ريال

وفــــي اي سنــــه دخــلــت عالـــــــم الانـــتـــرنـــــــت؟
أتوقع في سنة الـ 96 أو ال97
والمـــــــواقع اللـــــــي كنـــــــت تتـــردد عليـــــهــــــا ؟
صراحه ما كان يعجبني شي غير شبكة الخليفي ، كانت غايه في الروعه ، وكانت متعه حقيقية ، الله يسهل عليهم ،
الاحــــداث اللــــي واجهــتـــهــا في الانـــتـــــرنــــــــت؟
أهم الأحداث اللي لله الحمد أني ما تورط فيها وما أدري كيف الناس راح تقف أمام ربها يوم القيامه للي كانوا يدخلوا النت بحسابات غيرهم ، وكنت لما أروح ادفع بكيوتل السد أشوف ناس شياب مصدومين من الفواتير الهائلة من أستخدام النت كانت أرقامهم السرية مسروقه ويستعملها يمكن الف واحد ،
تـــاريخـــــــــــك فــــي بــــرامـــج المـــــحــــــادثـــــــه؟
شبكة الخليفي أول الأمر ، ثم أنتقلت للعالمية في الياهو ماسنجر بس لما كانوا يعرفون أني رجل :weeping: ما كان احد يعطيني وجه ، بس كنت أجري محادثات ممتعه قليله
والسنه الماضية جربت البال توك ، وما عجبني فيها إلا غرف المناظرات ، ولكنه ممل وفيه ناس ما عندهم سالفه وتركت هذا الموقع
وتقييمك لها وهــل انـــت مـــعـــهـــــا ام ضـــــدهـــــــا؟
والله أشوف المفسده أكثر من المصلحه
والمــــنـــتــــدى vs الــدردشــــــات .. ايهــما تفضـــل؟
المنتديات والرقابه أفضل من ترك الحبل على الغارب
ونصيحه اخيره للمشاركين الجدد في عالم الانــترنــــت؟
لا تهتك سترا ، ولا تفضح أحدا ... . فكما تدين تدان ،
وشكرا على الموضوع اللي فعلا الواحد يحس نفسه قديم
أخوكم
كان فيه وخلص ،،، ،


مرحبا اخوي ..

ايييه .. والله كانت الاسعار ضو ها ؟

انشهد ان ايام شبكة الخليفي كانت قمة المتعه ( لاتطلع بس من الشباب اللي نعرفهم )..
وبالنسبه للبالتوك حاليا لايقارن بقبل ..قبل كانت في تجمعات لشباب قطر وكان الوضع مختلف جدا
عن الحين .. سلمت ياخوي عالمشاركه ونصيحتك الاخيره
Charisma
18-02-2014, 01:45 PM
يااه موضعك ردني 15 سنه علاقتي بالأجهزة والكمبيوتر قديمة بقدم الأتاري وكمبيوتر صخر لعبه الحروف ووالقصر ( Castle Excellent) هذا بالثمانيات وكان اللعب له ساعات مخصصه
ودخلت عالم النت بالتسعينات وغالب الظن 1999 وكنت أدخل بعض مواقع الكروت الفلاشيه ... الصوتيات والتصاميم
وبرنامج الدردشة الشهيرmIRC وقتها أجانب حيث تلاقي فايدة بالحديث معهم تعرف عنهم وتعرفهم على العرب والأسلام والمسلمين كان أكثرهم من اللاتين والأمريكان


البالتوك رغم شهرته الأ إني ماحبيته ولا أذكر حتى إني دخلته ممكن دخلت الواجة الرئيسيه للبرنامج ماحبيته كلش

أما الدردشه الي تجي بالمواقع والمنتديات دخلتها بس ماحبيتها مبزرة سباب وعلوم مخيسه ولاهي حلوه حتى بالتصميم !!فماعاد دخلت لها كلش هي الثانيه

بعدين إنشغلت بالدراسه وبمشروع التخرج الخاص ببرنامج الفيجوال بيسك وكان عن جزء عم تلاوة وتفسير وترجمة بالإنجليزي
وأيضا برمجة السي بلس والتصميم بالفوتو شوب
وهالكلام في الألفيه والشغل كان بويندوز 2000 و ملينيوم وجهازي من شركة leo أبيض
للحين موجود عند أهلي.. بالمستودع:)
ما علينا
نرجع للنت. بطاقتنا كانت أول نت وفيه غيرها بس نسيت الأسماء..
إشتركت بكذا منتدى تقريبا 3 أو 4 بس مشاركاتي قلييله ..مثل منتديات المشاغب فيما يخص الكمبيوتر والبرامج والتصميم
فيه منتدى جدة غير بس غير عن المتواجد حاليا له نفس الأسم بس
وفيه شبكة أنا المسلم أيضا غير الموجودة حاليا..أذكر وقت أحداث 11سبتمبر كان هالموقع نشيط في نقل بعض الأمور
وأكثر شي لفت إنتباهي وللحين أدور عليه بس أختفى تقول مالها وجود!!...هي قصة أبو عبدالله المسلم أو عبدالله المسلم وكان فيه صور له
والسبب هي قصته المشوقه والمؤثرة كيف كان يهودي وتعلم كل الأمور العسكريه في إسرائيل..ولأن عندة جنسيه بريطانيه فكان يدخل للدول العربه وإلي غيرت في مجرى حياته هي أحداث في مصر وأحداث في قطر وأسلم في قطر وراح بعدها للشيشان لنقل تبرعات أهل قطر وإستقر فيها للجهاد مع أخوانه بالشيشان والأجمل هو إن أخته طبيبه وبعد أسلمت وخدمت بالشيشان :)
هذي بختصار القصة طوووويله فيها أحداث كثيييرة مشوقه ورائعه ..أعرف مو وقته بس تذكرتها وحبيت أشاركها معكم:)

المهم قضيت وقتي بالقراءه في مجالات مختلفة وإستفدت الكثير ولله الحمد والمنه وبعد إستخدمته في الترفيه والألعاب الفلاشيه منها أؤ الألعاب مثل التريفيان والبليارد
بس مو دايم ولا بشكل مستمر حتى....ولي سنوااات مالعبتها!

شكرا لك عالموضوع الرائع:victory:


مرحبا اخوي ديور ..

بالنسبه لموضوع الصخر عندي لعبه ( الملكه ) للحين محتفظ فيها .
برامج الدردشه في بدايتها كان عليها الاقبال لان ماكانت في برامج تواصل او مواقع مثلها
وصدقت مثل ماقلت بالنسبه لمواقع الدردشه كل سنه كان (يمصخ) الموضوع وتزيد البلاوي فيها
ولا في بدايتها بصراحه كانت متعه ..
ذكرتني بالمشاغب ( الله يرحم راعيه ) .. من المواقع اللي استفدت منها استفاده كبيره فيما يخص الكمبيوتر والبرامج
وتجربه انظمة مختلفه ( لينكس فيدورا كور ..والويندوز بانواعه ) < وحاليا ماك ..

بالنسبه لقصه ابوعبدالله ماسمعت فيها بس خليت الفضول يدخل مخي ادور عنها

على طاري البليارد .. من كان فيكم كان يدخل البليارد حق الياهو ؟ ... يا اننن انوااع الاكشن كانت تصير.

تسلم عالمشاركه المميزه اخوي ديور :nice:
Charisma
18-02-2014, 01:45 PM
متاااابع

ممنوع المتابعه شارك واتحفنا :nice:
Dana’1
18-02-2014, 02:21 PM
مرحبا اخوي ديور ..

بالنسبه لموضوع الصخر عندي لعبه ( الملكه ) للحين محتفظ فيها .
برامج الدردشه في بدايتها كان عليها الاقبال لان ماكانت في برامج تواصل او مواقع مثلها
وصدقت مثل ماقلت بالنسبه لمواقع الدردشه كل سنه كان (يمصخ) الموضوع وتزيد البلاوي فيها
ولا في بدايتها بصراحه كانت متعه ..
ذكرتني بالمشاغب ( الله يرحم راعيه ) .. من المواقع اللي استفدت منها استفاده كبيره فيما يخص الكمبيوتر والبرامج
وتجربه انظمة مختلفه ( لينكس فيدورا كور ..والويندوز بانواعه ) < وحاليا ماك ..

بالنسبه لقصه ابوعبدالله ماسمعت فيها بس خليت الفضول يدخل مخي ادور عنها

على طاري البليارد .. من كان فيكم كان يدخل البليارد حق الياهو ؟ ... يا اننن انوااع الاكشن كانت تصير.
تسلم عالمشاركه المميزه اخوي ديور :nice:
الله يسلمك ...وانا أخت مش أخ:)

فعلا المشاغب منتدى مفيد وانا بعد جربت أنظمه كثيرة وحاليا جهازي ماك وهو رائع بس مشكلته ما تنزل عليه بعض البرامج .. صخيح لعا برامج مشابهه ولكن مو نفس الي تتعود علية

أما قصة عبدالله ياليتني كنت حافظه تفاصيلها الدقيقة وطريقة سردها لكان كتبتها
بس أذكرها بالعموم وأذكر صورته وهو ضرير بسبب إصابته في ساحات الجهاد
غايه الطواش
18-02-2014, 03:12 PM
الله على هالموضوع الجميل , اول بدايه للنت كانت لي في عام 96
وكنت اروح كافيه في مجمع غرناطه , وماكنت اعرف الا الفري تل , عقب عرفت البالتوك , mrc
وكنا اشبك 166 و161 ووقتها اختي معاي بالغرفه , كانت تنام والاخت غايه سهرانه ع النت
وياويلي وياسودا ليلي من ابوي لي جات الفاتوره ,,
اتمنى الارض تنشق وتبلعني بس بعد ماتوب ...
عقبها سجلت في اول منتدى في حياتي كان اسمه كل العرب , تعلمت فيه امور النت ,
شلون اضيف الصور وشلون اصغرها وشلون اركب هاكات , واشتركت في قروبات
مالت بطاقات واغاني , وكنت اطرش حق ربعي وعقب اتصل لهم تلفون شفتوني شنو مطرشه ( الحمدالله والشكر)
وعقب شوي قمت ادخل قسم الكمبيوتر وصرت اعرف اركب الكبيوتر وافصله وارجع برامج محذوفه ,
وتصور الامور تنزيل برنامج وسيريال نمر وادور ع السيريال نمر فالنت , وتطور الامور ان اذا مواقع مسكره افتحها ببروكسي
عقب دخلت الجامعه وعقلت شوي ودعت عالم الشات بكبره وصرت ادخل مواقع مفيده منتدى منتدى حواء ,وتعلمت طبخات كثيره من النت
وكنت ماسكه موقع طبخ واحط طبخات في اسمه الموقع العربي

وعقبها تولعت بالتصوير
ودخلت مواقع تصوير واخذت دورس عن طريق النت سجلت بالمنتدى وحطيت صور واستفد من الانتقادات والتجارب
تعرفت على بنات في منتدى التصوير واتفقنا ناخذ دوره تصوير في قناه الجزيره واليوم هالبنات مثل خواتي واكثر ومن يذكرون اسمي لازم هالثنتين معاي ,
وتطور الامر وشاركت في منتديات خليجيه , انفتح لي الباب اني اشارك في معارض تصوير في دبي وجده وابوظبي وامريكا
وتعرفت على مصورين والنعم فيهم فادوني بارك الله فيهم وسوينا قروب قمنا نسوي تغطيات تصوير ونتطوع في تغطيه الفعاليات الخاصه بالدوله
مثل بطوله اتحاد الدراجات المائيه واليوم الوطني او المشاركه في بعض الانشطه الشبابيه الخاصه فالدوله


ومن اهم المنتديات القطريه الي سجلت بها مجالس بو حمدان ومنتدى الجلسه بس ماكنت اشارك فيهم بس اشوف , وقمت اشارك في منتدى العنابي وانا قطر ومنتدى الدوحه .ومنتدى الجامعه
Charisma
20-02-2014, 09:20 PM
الله يسلمك ...وانا أخت مش أخ:)

فعلا المشاغب منتدى مفيد وانا بعد جربت أنظمه كثيرة وحاليا جهازي ماك وهو رائع بس مشكلته ما تنزل عليه بعض البرامج .. صخيح لعا برامج مشابهه ولكن مو نفس الي تتعود علية

أما قصة عبدالله ياليتني كنت حافظه تفاصيلها الدقيقة وطريقة سردها لكان كتبتها
بس أذكرها بالعموم وأذكر صورته وهو ضرير بسبب إصابته في ساحات الجهاد


نعتذر عن ( الخربطه ) اخت ديور ..

الماك فتره وتتاقلمين عليه .. وبكل الاحوال في الحالات الحرجه ( بوت كامب ويندوز ) او بارلل ... عن نفسي ست شهور ماشتغل الويندوز
Charisma
20-02-2014, 09:27 PM
الله على هالموضوع الجميل , اول بدايه للنت كانت لي في عام 96
وكنت اروح كافيه في مجمع غرناطه , وماكنت اعرف الا الفري تل , عقب عرفت البالتوك , mrc
وكنا اشبك 166 و161 ووقتها اختي معاي بالغرفه , كانت تنام والاخت غايه سهرانه ع النت
وياويلي وياسودا ليلي من ابوي لي جات الفاتوره ,,
اتمنى الارض تنشق وتبلعني بس بعد ماتوب ...
عقبها سجلت في اول منتدى في حياتي كان اسمه كل العرب , تعلمت فيه امور النت ,
شلون اضيف الصور وشلون اصغرها وشلون اركب هاكات , واشتركت في قروبات
مالت بطاقات واغاني , وكنت اطرش حق ربعي وعقب اتصل لهم تلفون شفتوني شنو مطرشه ( الحمدالله والشكر)
وعقب شوي قمت ادخل قسم الكمبيوتر وصرت اعرف اركب الكبيوتر وافصله وارجع برامج محذوفه ,
وتصور الامور تنزيل برنامج وسيريال نمر وادور ع السيريال نمر فالنت , وتطور الامور ان اذا مواقع مسكره افتحها ببروكسي
عقب دخلت الجامعه وعقلت شوي ودعت عالم الشات بكبره وصرت ادخل مواقع مفيده منتدى منتدى حواء ,وتعلمت طبخات كثيره من النت
وكنت ماسكه موقع طبخ واحط طبخات في اسمه الموقع العربي

وعقبها تولعت بالتصوير
ودخلت مواقع تصوير واخذت دورس عن طريق النت سجلت بالمنتدى وحطيت صور واستفد من الانتقادات والتجارب
تعرفت على بنات في منتدى التصوير واتفقنا ناخذ دوره تصوير في قناه الجزيره واليوم هالبنات مثل خواتي واكثر ومن يذكرون اسمي لازم هالثنتين معاي ,
وتطور الامر وشاركت في منتديات خليجيه , انفتح لي الباب اني اشارك في معارض تصوير في دبي وجده وابوظبي وامريكا
وتعرفت على مصورين والنعم فيهم فادوني بارك الله فيهم وسوينا قروب قمنا نسوي تغطيات تصوير ونتطوع في تغطيه الفعاليات الخاصه بالدوله
مثل بطوله اتحاد الدراجات المائيه واليوم الوطني او المشاركه في بعض الانشطه الشبابيه الخاصه فالدوله


ومن اهم المنتديات القطريه الي سجلت بها مجالس بو حمدان ومنتدى الجلسه بس ماكنت اشارك فيهم بس اشوف , وقمت اشارك في منتدى العنابي وانا قطر ومنتدى الدوحه .ومنتدى الجامعه

مرحبا اخت غايه ..

صحيح اذكر ان كان في مقهى انترنت في غرناطه للبنات ..
اما في التاون سنتر اذكر كان في مقهى وكنا مرابطين فيه..ومقهى ثاني ورى المتحف .. ايام :)
الانترنت فتح لاغلبنا مجالات كثيره للابداع . مثل ماتفضلتي
العنابي ايام شايب قطر .. وانا قطري ايام مخفي كامل .. ومنتدى الجامعه شاركت فيه ( اذكر اسير نت قسم الكمبيوتر )
ايام حلوة وماتنسي .. بيجي يوم بنتذكر فيه ايامنا في منتدى الاسهم القطريه :nice:

شاكر لج مشاركتج اخت غايه