-
تواير قوود يير..!!
السلام عليكم..
عندي سيارة جمس مركب عليها تواير قووديير على رنق 20..
والسيارة الثانية لكزس مركب عليها تواير دنلوب ايضا على رنق 20..
المهم سافرت لمدة 20 يوم تقريبا ورجعت الدوحة اسوق السيارة الاولى ولاحظت فيها اهتزازات..
وديتها للشركة اللي هي كيو تاير شيكوا على التواير..
قالوا لي انت شكلك وقفت السيارة فترة طويلة وهذي سوى لك فلات سبوت..
فلات سبوت هذي يا اخوان ان التاير يكون مستدير من جميع الجهات ما عدى الجهه اللي واقف عليها تصير مسطحة..
والحين التواير خربانين خلاص..!!
طبعا ناديت السوبرفايزر وقلت له بلا لف ولا دوران.. مب 20 يوم اللي تسوي فلات سبوت..
وانا عندي سيارة ثانية لكزس فوورويل مركب عليها دنلوب رنق 20 وما صار لها اي شي..
مع العلم ان اللكزس كان واقف فترة اطول من 20 يوم ولا صار له شي..
قال لي هذا الجمس لانه ثقيل.. واللكزس خفيف..!! يعني بيطلع ذكي..
طلعت له استمارة السيارتين ورويته ان وزن اللكزس اكثر من وزن الجمس..
المهم لما شاف انه ما عرف يلعب علي قال لي والله هذي توايرنا جذي يصير فيها اذا وقفتها فترة..
يعني ليش قيمتهم اكثر من التواير الثانية..؟؟ ونوعيتها رديئة لهالدرجة..؟؟ هذي اوروبي وليس صيني..؟؟
المهم دريت ان السالفة فيها حماية المستهلك وروح وتعال وان الموضوع بياخذ اكثر من وقته بكثييييير.. ف قلت حسبي الله عليكم وحركت..
ومن هنا وجب التحذير.. وسامحونا عالاطالة..
-
اخوي هذا يعتبر عيب مصنعي وغصب عنهم يغيرون لك التواير لان ضمانها 6 شهور اقرى شروط الضمان وعيب التوايرك من ضمن الضمان.. اذا الفاتوره معاك اشتك عند حماية المستهلك . وان شاءالله مايقصرون معاك .
-
معروفه تواير قووود يييير فاشله عن تجربه
-
لاعيب مصنعي ولاشي هم يبيعونه ب1300 وهو نفسه ينباع ورا مركز سلوى ب 550 ريال
-
كان يفترض منك ان تقوم بمخاطبة حماية المستهلك ونعرف منك ماذا توصلت بعد ذلك
لافائدة من طرح موضوع دون اتخاذ اجراء .
-
تواصلت مع حماية المستهلك قالوا لي دام ان الضمان انتهى خلاص مالك حق تشتكي..
للعلم ضمان التاير 6 شهور وهم اختربوا في الشهر السابع..
-
هم لو تواير صناعة رديئة مثلا ورخيصة قلنا يمكن..
لكن قوود يير والواحد بالف وميتين وستين..!!
-
السلام عليكم
انا ما افهم بهالسوالف بس قلت بشوف شو بلاهن تواير سيارات اخويه قطر مان ثمانتالاف وثمانيه الله يحفظه ويحفظكم
و احب ايمع معلومات يمكن استفيد منها مستقبلا
-
اكيد.. الموضوع فيه فايدة للجميع..
اللي ما بيستفيد منه الخين بيستفيد منه عقب..
-
الله يعينك هذا لازم على الضمان
بس اخواني في نقطه مهمه هني
انتوا كلكم تقريبا ليش بنفس التفكير ان لازم ماركة و هذه فيها حياة أرواح و مب لعبه....
هذا انا بعد ركبت تواير يوكوهاما للأسف الشهر الثامن, صار انتفاخ, ضمانهم ست شهور مثل ما انتو عارفين
يعني بالله عليكم الشمس تعرف شي اسمه دانلووب ولا بيرلي و ماتقرب صوبه، و تروح تستقصد الصيني؟؟؟؟
اخواني انا بدل ما اشتري الواحد و فرضا نقول للنيسان بترول اروح اخذ اربع تواير بسعر الواحد و هذا اللي بديت اطبقه والحمدلله سواقه آمنة و كل شي تمام
كل ما اروح الامارات اشتري صيني يكون صناعته جديدة يعني احنا في 2006 اخذ على الأقل 2015 مب اقل و توفر كثير بدل المفوشر و ماركة مادري شنو و لا المواصفات و الخرابيط،، اللي بيدعس 180 و 200 خل يلوم نفسه و تهوره، مب يلوم التاير، هذه وجهه نظري اشتري صيني و بس
بالتوفيق للجميع و معوض اخوي بس رص عليهم الخمه هاذول