-
مشاهدات و وجهات نظر
السلام عليكم ورحمة الله وبركاته
هذا موضوع جديد نضيفه للاستراحة، يحتوي على المشاهدات اليومية اللي ممكن نشوفها في الشارع ونضيف لها تعليقنا اللي يعبر عن انطباعنا أو ردة فعلنا اللحظية عند المشاهدة بدون معالجة..
يمكن أن نضيف لهذا الموضوع الأفكار أو القناعات التي استجدت لديك نتيجة لموقف شاهدته أو اطلعت عليه
عسى أن يكون هذا الموضوع إضافة جيدة على أمل أن تجدوا فيه الفائدة والمتعة
وشكراََ
-
ياصلاة النبي .. :app2:
يالله ابدأ حضرتك عشان استوعب الموضوع ..
-
حياك الله اخت ساره، وما يخالف ببدأ بالقناعة اللي تكونت عندي اليوم.. وهي أن الشكوى على انسان واقف وشايف ما تعتبر شكوى بل استجداء.
لأن اذا بتشتكي فمعناه تبلغ عن شيء فات المسؤول؛ أما اذا المسؤول يدري فانت رايح تستجدي فيه الضمير أن يتدخل. لذلك لا تشتكي على اللي حاضر وناظر.. لأنه بحكم الراضي
-
مشاهد كثيرة نمر بها تقريباً كل يوم
أوقات طريق جديد مفتوح حديث وما اكتمل في أجزاء كثيرة صغيرة وتافهة على الشغل اللي تم .. هذي تبقى عيب وتقصير مستمر لفترة طويلة وأحلف إن بعضها صار له فوق السنة
-
مشهد لاحظته وحبيته في لبنان ناثرين ليتات صغار ال اي دي قرب بعض زوايا الأرصفة الخطرة حتى يشوفها السايق ويبتعد عنها .. عندنا فجأة تلاقي حاجز بارز في طريق سريع ولا حوله إنارة ولا عاكس لوقت النهار وفيه تراخي كبير في هذا الشيء .. شغلة بسيطة تسويها بتفكير متحضر وبميزانية قليلة وتعطي مردود جيد وتنقذ حياة بشر كثيرين وتوفر مالهم
-
يمكن نركز على الجانب السلبي أكثر لكن الجوانب الايجابية كثيرة
ملاحظتي للزراعة في كثير طرق وأماكن ايجابية بس في بعض الأماكن زراعة بدون ترتيب حولها وواضح إنها مؤقتة للحبايب ربع 2022
-
اليوم شفت سيارة صغيرة لفت لفة قوية على سيارة ثانية والغريب صاحب السيارة اللي له المسار ما تحرك ولا هرًن ولا شيء، يوم قرب مني الا هو حاط السيجارة أمامه ويدخن و لا درى باللي في الشارع، حقيقة رباطة جأش و تحكم مية بالمية.
-
اليوم بعد صرت شبه مقتنع أن اغلب الشباب المقبلين علي الزواج غير مستعدين له ولا يعرفون يتلافون أول مشكلة ممكن يواجهونها. لذلك بصراحة زوجوهم وايديكم على قلوبكم.
-
الموقف باللولوه تحديدا منطقة السنترال
كان هدؤ والجو حلو والجلسات الخارجيهبالمقاهي و المطاعم مليانه ناس وحتى حول النوافير والحديقه اللي بالنص الاطفال يلعبون
فجأه إلا صوت صرااخ يا.....تعرف أنا ولد من؟! كررها أكثر من مره
التفت أشوف شسالفه إلا شاب نازل من سيارته الفارهه جدا جدا وتارك فيها امرأه زوجته أو أخته المهم رايح للسياره اللي قدامه لاند كروزر فيها شخص واحد شكله الحمدلله الذي عافنا و عيالنا مما ابتلي به وفضلنا على كثير مما خلق تفضيلا
ناعم مره مره و مسكر الباب و الدرايش و الرجال المعصب يوم وصل عنده حاول يفتح الباب ما قدر فشال نعاله وقام يضرب الدريشه ويقول أفتح الباب يا.... ويكرر طلبه وهذاك اللي بالسياره ولا التفت يمكن بس نص نظره يتبوسم ويطالع لقدام و لا تحرك نهائي و لا نزل!
قام الرجال اخذ نعاله ويضرب فيها عالدريشه بقوه ويهدد
تعرف آنآ ولد من؟!
أفتح الباب يا...!
تعرف آنآ ولد من؟!
و عادها أكثر من مره وهذاك على وضعيته محلك سر.
شوي الا جات سيارة آمن اللؤلؤه من ثم آمن ناسيه اذا النجده او المرور لكن
السيارات جايه ما أعرف اذا جايه من بلآغ أو عمل روتيني كالعاده فـ على ما تاخذ الدوار اللي بالسنترال اللي بالكروزر حرك و الرجال رجع سيارته وهو معصب.
بصراحه أنا ما أقدر أحكم لأن ما أعرف ايش سوى لهم راعي الكروزر عشان يغضب لهذا الحد
لكن من الأساس وخصوصا أنك ولد شخصيه ذات منصب وصيت ليش ما أكتفيت بتصوير السياره ورقم اللوحه والبلاغ عليه و أظن اللولوه فيها كاميرات يقدرون يرجعون لها اذا فتح تحقيق.
أو على الأقل نزلت عادي بس يوم شفت انه ما فتح الباب و نزل يتفاهم معك او يعتذر لك عن ما بدر منه كان أفضل ترد للسياره .
وتاخذ صوره وتبلغ و تتابع الموضوع هذي كل موتطن يقدر يسويها فما بالك بشخصيه واصله.
بس بعد ما أقدر الومه لأن ما اعرف هذاك ايش سوى غير إن الغضب و قهر الرجال مشكله خصوصا وابليس يكبر الأمور ويحب الضرب و المقاتل
الله يهدي الجميع
-
مساء الخير
انت تتابع الاعلام و تطبيقات التواصل، وغيرك يتابعها أيضاََ، اغلب المعلومات التي يعرفها الآخر عن بلادك و عنك معلومات مغلوطة، أنت لديك فلتر تعرف تختار ما هو صحيح وما هو خاطىء عن بلادك لكن غيرك ليس لديه هذا الفلتر.
والسبب الاعلام و تطبيقات التواصل المذكورة، لذلك لا تثق فيما تحصل عليه من معلومات عن البلاد الأخرى من خلال هذه القنوات.