السلام عليكم ورحمة الله وبركاته
اليوم حبيت أقول لكم عن هذي الخطة ، ورحة بلدية أم صلال على ، وقالي البنت هاوس صحيح 70% لكن لها شروط
الى هيه 3متر من واجهة المنزل و3 متر ارتداد من الخلف ، وبذالك يكون شكل البيت بعيد من تصميم العماره ، على قولة المهندس الى كلمني
في رابط للخطة الوطنية على موقع وزارة البلدية والبيئة ، لكن أنتبه لازم تستخدم محرك البحث الاكسبلور وليس شاروم عشان يفتح معاك الرابط
اتمنى تشوفون الخطة لني ماقدرت أفهم منهم التفاصيل :d
انا والله ياخوي ما شفت شي بس اللي فاهمة من أفلامهم ان النسبة ما تكون مثل ما الواحد يتخيلها بعد ماتطبق شروطهم المعجزة... اعتقد في عوامل تاثر في الموضوع كله مثل نسبة البناء بالنسبة لمساحة الارض المسموح فيها ونسبة التغطية وموافقة الجيران وارتدادات..... في النهاية ترى نفسك ماتقدر تعدى نسبة معينة هي اقل من 70 في المية .... يعني نرد للواسطة أحسن ��
الخطة العمرانية الشاملة شيء والقوانين الخاصة بالمساكن شيء ثاني وللأسف في الثنتين راسبين التخطيط بإمتياز
الأُولى تعني نظرة مستقبلية يمشون عليها حتى لو بعد عشرات السنين وتكون 90% منها غير قابل للتغيير الا في حدود ضيقة .. تشمل خطة الطرق واستخدام الارض وتطويرها وخطط البناء المستقبلية لعيادات أو مستشفيات أو مدارس أو مطارات وعندنا حسب علمي 4 مطارات في قطر ومطار الدوحة القديم فيه عدة أقسام وكل قسم نقدر نسميه مطار
الخطة العمرانية الشاملة موضوع معقد وصعب ويحتاج مجموعة كبيرة من المخططين كما يحتاج قرار سياسي على أعلى مستوى والتزام .. أول فشل حصل عندنا كان في تطوير منطقة الكورنيش والابراج .. كانت خطتها بأن تكون الارتفاعات 4 أدوار ثم 8 ثم 12 ثم 16 الى اعتقد 32 دور بس تكون كمدرج حتى الكل يحصل اطلالة على البحر وكانت كل بناية ملتفة 45 درجة حتى تكون لها واجهتين بحرية بدال واجهة .. وبدأ اللعب على الخطة من زمان واستوت زحمة أبراج بدون متنفس بينها وبدون تدرج وبدون تركيز على الطرق والمواقف
الفرجان البعيدة للحين نشوف التخطيط الدائري والشوارع كلها فرعية وضيقة .. ما فيه فرق بين الشارع الفرعي وشبه الرئيسي وعادي تحصل شارع شبه رئيسي عليه بوابات وطرق تسرب له وعادي تحصل حتى مطبات ودوارات صغار مزعجة .. وللحين معتمدين النظام المقوس والدائري .. وهذا دليل ضعف هذي الخطة لأنه مبني على تخطيط قديم ولا نستعمل فيه سمات حديثة
أُمور كثيرة صعب ايجازها بسرعة
نروح حق القوانين الخاصة بالبناء والشوارع التجارية وهذي بروحها تحتاج بعد شرح وتوضيح كامل والمفروض لكل منطقة وشارع قرار مرتبط بالخطة الشاملة ومقرر من زمان .. يبقى تطوير سمات المباني والطرق حولها ولازم يكون الشارع التجاري مخطط من الأساس ليكون شارع تجاري وكذلك المناطق السكنية .. قد يفصل بينهم شارع رئيسي لا يمكن قطعه ومحاط بسياج مانع لمرور البشر والحيوانات .. عادي نشوف مول حوله طريق مفتوح على منازل
الاستفادة من الارض السكنية لها عدة سمات .. منها المنازل المفصولة ومنها البنيات المتراصة جنباً لجنب ولها واجهة وشارع خلفي وهذي ضرورية لتطوير بعض المناطق السكنية للاستفادة القصوى من الارض .. وكذلك منها العمارات بكافة أنواعها ومنها المناطق السكنية المغلقة أو المجمعات السكنية وكل منطقة لها تطوير خاص وقوانين خاصة
للسكن الشخصي العادي وهو اللي يهمنا زيادة 30% فوق بس ما تنفع في شيء .. مع وضع قيود ما تخلي المالك يستفيد استفادة كاملة من الأرض وذكرتها مرات عديدة
جزاك الله خير يابوعبدالله على ردّك الشامل ... بس ابي رأيك محدد بالنسبة للبنت هاوس هل يمكن تحقيق 70 % او لا مع شروطهم التعجيزية مع العلم ان في ناس بالواسطة و المخالفة ماخذين اكثر من النسبة هذي ... مع شكري وتقديري
أتوقع ممكن بسهولة بس لازم بتدخل في مشاكل انشائية .. لو تركت 3 متر من كل ناحية ولنفترض حدود بيتك 20 في 20 بمساحة 400 متر مربع وبتدخل 3 متر من كل جانب بتصفي على مساحة 14 في 14 = 196 وهي اقل من 50% .. ولو فرضاً ورا يصير على حدود البيت بتصفي على 14 في 17 وهي بحدود 238 تقريباً 60%اقتباس:
المشاركة الأصلية كتبت بواسطة $الملياردير$
لنفترض بيتك مسطح الدور فيه 500 النتهاوس أما يكون 14 في 22 أو 14 في 19 على فرض عندك 25 في 20 مسطح السقف .. الأُولى بتكون 61.6% والثانية بتكون 53.2%
نشوف إن القانون بيستفيدون منه أصحاب الأراضي الكبيرة واللي بيبنون مساحات كبيرة أما الصغيرة بيحاولون يخلون الإرتداد من فوق مترين ونص أو مترين حتى يقدرون يوصلون مساحة أقرب لل 70%
الخلاصة لازم يخلون المسافة حتى لو متر ونص .. ولو سووا درايش بارتفاع كامل بيغطيها سور السقف وبتستوي ما تطل على الجار وهو المهم عندهم وكذلك متر ونص تكفي للتكييف ولبعض الزراعة فوق لتجميل البنتهاوس وحتى متر كفاية
لنفترض عندنا بيت 15 في 15 = 225 متر مربع وعطونا ارتداد للبنتهاوس متر ونص من كل الجهات الا الجهة الخلفية واللي العادة يكون فيها بيت الدرج والمصعد .. بنصفي على مساحة 12 في 13.5 = 162 وهي 72%
مسطح 15 في 15 اقتصادي للأراضي الصغيرة ولازم التخطيط يراعي الأراضي الصغيرة أول شيء وبعدين الكبيرة أما يحطون قانون ظالم للأراضي الصغيرة ومنصف للكبيرة هذا خطأ تخطيطي كبير
بعدين مسطح البناء للأرض محدود اعتقد ب 60% للمباني كلها واللي يقهر يحسبون حتى المظلات من المساحات المغطاة .. يعني لو أرضك 1200 يحق لك تبني على 720 متر مربع شامل أي ملحق وأي مجلس وأي مظلة .. و مساحة 1200 في العادة مسطح البيت ما يتعدى 500 والمفروض ربعنا يحددون الارتداد من سور السقف بدون نسبة يعني يكون متر للاراضي الصغيرة ومتر ونص للمتوسطة و 3 أمتار مريحة للكبيرة
انا افضل البناء على جزء من المبنى بحيث تكون الجسور والأعمدة فوق بعض أما تقول لي ارتد 3 متر بيكون البنيان فوق غرفة في الغالب وباحتد اسوي جسور قوية حق تتحمل وزن الجدران وباحتد احط أعمدة غير تسمى الأعمدة المزروعة وبتطلع تكلفة البنتهاوس غالية
اللي يشوف مخطط بيتي مسوي البنتهاوس على حدود السطح بس مساحته ما تجي 40% من مساحة السطح .. موجود في صفحة 71 الى 78 في موضوع مراجعة المخططات العمرانية .. لكن أهم شيء حاسب حساب الحوائط والأعمدة
هذا اللي انا أقصدة اعلان من بداية يخدعك بالرقم المعلن للنسبة ... بس لما تجي بالواقع تنصدم .... وانت اختصرت الفكرة من ناحية الأعمدة المزروعة و النسبة المغطاة والمسموحة للبناء الكلي ع الارض يعني ما اعتقد واحد راح يصغر في الدور الأرضي و الاول عشان يتمتع بمساحة اكبر في البنت هاوس ... أضف الى ذلك ان التكيف وبعض الخدمات راح تكون عائق للي يبي يتوسع على بناء قائم .... شكرا بوعبدالله على مشاركتك
العفو يا اخوي
إحنا نستشف الخوافي بس مؤكد هو قرار ولازم بيشوفون شيستوي فيه ولازم عليه تعديلات أصلاً تعودنا على الشغل الناقص خصوصاً في التخطيط
لو يقولون مساحة البنتهاوس بحد أقصى 70% والارتدادات تكون حسب المساحة ومن الخلف بدون ارتداد أو جهة الشارع بيكون الوضع أفضل وبيكونون صريحين أكثر
يعني مساحة 300 يكون عليها 225 متر مربع ولو كانت أبعادها 15 في 20 بيكون بعد يساوي مثلاً 13 حتى تترك مترين من جهة البعد الطويل وتبني على الحد من ورا بيكون البعد الباقي 17.3 متر ننقصها من ال 20 تبقى عندنا 2.7 على الجهتين تستوي كل جهة ارتداد 1.35 متر وجهة الأمام 2 متر وبعد هذي المسافات جيدة وتضمن تغطية للنوافذ بسور السطح .. الجهة الخلفية لو بنخليها على سور السقف ممكن نسويها بدون نوافذ أو نسوي مناور نازلة فقط لمستوى أرضية السطح وتنفتح عليها درايش للجهة الخلفية لو كانت مطلة على جار