المشاركة الأصلية كتبت بواسطة برنس قطر
سلام عليكم ورحمة الله وبركاته
ممكن استشاره بخصوص " برك سباحه في البيت "
عندي بيت ابنيه وفيه بركة سباحه طوالها 6 وعرضها 4 متر
ابيها حق العيال ممكن اعرف وين احسن مكان يعملونها لي للعلم تم حفر الحفره لها
بس مش عارف وين لاحسن
فيه الجبر وفيه رجنسي بس وين لافضل وهل فيه شركات ثانيه
واهم شي بعد صيانه بعد لانتهاء منها .....
ياليت احد يفيدني
إخوي توني مخلص حوض سباحه في بيتي ما صار لي ست شهور غلطت غلطتك بديت شغلي شهر يمكن 3 وما خلصت الا شهر 10 يعني ما لحقت على الحر ... بس حظي كنت مسوي تغطية سقف شفاف يدخل الشمس ومسوي مراوح شفط وتكييف وتدفئة للماي وللحيز ككل ... الحوض بمعداته كلفني 85000 ومساحته 7متر في 4 والعمق عندك متدرج جزء 1.2 وجزء 1.6 متر ... وتبي نصيحتي خله كله مستوى واحد وعندك من 1.15 إلى 1.25 إرتفاع معقول ومناسب للكل وما بيكون مكلف .. انا عندي التكلفة شاملة فايبر اوبتكس لايت .. إنارة فايبر اوبتكس المتلونه ومتغيره تلقائياً بحدود 11000 ومكينة التسخين ب 24000 والحوض بباقي معداته ب 50000 وبالنسبة لك إذا بتركب سخان الماي وبتسوي عمق معقول بيكون ممكن في حدود 60000 ولتنسى التبليط حوله عليك والحفر والدفان بعد وشوف أحسن شركتين شركة تدمر ومكانهم على الدائري الثالث مع دخلة السفارة الليبية وبعدها بمسافه على اليمين، وشركة جامكو على طريق المطار قريب دوار سلاح الجو عند مديرهم الهندي ووالله يعينك عليهم الكل مشغول وكل شيء طلبيه وبيجيك ضغط ... خلك كول وحط في بالك بتخلص يمكن على آخر الصيف الا إذا تبي تسوي شيء بسيط ممكن يخلص في شهرين
وتدري شالأهم من كل هذا كماليات وتشطيب المنطقة حول الحوض ... يعني جهز مكان حق يكرم القاريء الحمام ولو عندك مساحة وتبي تدلع نفسك عدل سو حمام بخار وبحبح نفسك أكثر شوي بصالة رياضة صغيرة ، وشوي شوي بعد ضيف عليها سونا بحدود 20 إلى 30 الف بس لتاخذ الا سويديه ولا سويسريه ماركة معروفه ولا أمريكية وإبعد عن أي شيء صيني
طبعاً كل هذا يحتاج كهربه كفايه وتخطيط وموافقات ... إن حصلت فرصه باصور الحوض اللي سويته وباحط الصور بس الله يعينني عليمي توني يديد هنيه