بالمطرقه
اكتشفت بقدرة قادر ان السبب الرئيسي للزحمه في الشوارع مش الباصات... ولا الدريوليه ... ولا الحريم ... ولا الاجانب ... ولا السيارات اصلاًالسبب الرئيسي للزحمه هو المدارس الخاصه ... المشكله مش في المدارس نفسها ... المشكله انها تجبر كل الباصات والدريوليه والحريم والاجانب ينصبون في الشارع بنفس الوقت مع توزيع جغرافي خربطاوي عنقشاوي فوضوي محض ... اللي في شرق يودي عياله غرب واللي في الشمال يودي عياله الجنوب...
استمروا في تبليط البحر بارك الله فيكم...
استغرب من تحندي كثير من الناس بعدم مشاركة الدوله لهم ثرواتها ... ولا خصخصت شركه من شركاتها النفطيه قاموا يتحلطمون حرام وشبهه ...
طيب شلون تبيها تشاركك الثروه طال عمرك ؟!! تمشي لك معاش اول ماتولد على اساس ان هذا المعاش جا من بيت مال المسلمين ؟!!
في الموضوع الاول رقم 1 تكلمت عن اجازة اليوم الوطني راح تكون يومين مع الويكند وتم حذف الجزئيه من الموضوع ... نعم للرقابه يا ادارة المنتدى العزيزه ولكن كون العيد الوطني بيصادف الاربعاء والقانون معروف ان اي يوم يقع بين عطلتين رسميتين يصبح عطله فما كتبنا شي غلط ولا روجنا اشاعه فلماذا القص ؟!!
بعيداً عن السياسه .. بما ان المنتدى اجتماعي ... في نواحي اجتماعيه ... تؤثر عليها نواحي اقتصاديه .. اللي بدورها تتأثر بالنواحي السياسيه ... وبما اننا ممنوعون من مناقشة النواحي السياسيه ... اللي تأثيرها يمتد للنواحي الاجتماعيه فمعناتها ان في نواحي اجتماعيه لا يوجد لها حلول جذريه لان ام زوجها النواحي السياسيه متهاوشه مع امها النواحي الاقتصاديه ومحد قادر يمسك امها ولا حد قادر يكلم ام زوجها !!!
|
رد مع اقتباس
