المعذرة المشاركتين فوق بالغلط تعليق على الأسهم القطرية
المعذرة المشاركتين فوق بالغلط تعليق على الأسهم القطرية
أنهيت تقريباً منطقة المكتب وملحقاته وأفكر في مسئلة التكييف ممكن وحدة الدكت سبلت للمكتب في سقف دورة المياه لأن هذي بتكون قليل استخدامها حتى لو الصوت مزعج دخول دورة المياه قليل تحتوي على كرسي ومغسلة فقط .. وبالنسبة للصالة ممكن يكون التكييف في سقف الموزع أو في سقف المخزن مع عمل تمديد بايب يودي المياه للزراعة في الخلف باوضح طريقته بعد في الرسم ما دام جهزت مخطط الحوائط كل شيء سهل بيكون
تم ترقيم الزوايا بأحرف حتى تسهل معرفة جهة النظر بدال الإتجاهات والطريقتين يمشون
من التعديلات اللي مصر عليها ومسلمها للاستشاري في الأساس تكون الدريشة طرفية وبما إن عمقها كبير بتكون جهة الخارج داخلة شوي حتى لو سويناها بكامل الإرتفاع ممكن تتغطى بستارة لو نحب بس قلت هذا حمام صغير ودريشة مرتفعة كفاية بعرض 60 سم الصافي منها بين 48 سم أو 46 حسب سمك الفريم .. الله يهداه متفيهم أزيد من اللازم راح غير وحط الدريشة وسط وانا ابغي مساحة كافية للدكت مسوي الدكت وايد صغيرة هو خليتها مثل ما سواها بس مغيرة في تفصيل الحائط وأصلاً الدكتات بتكون منطقة مفتوحة مغطاة باسمنت بورد باسوي تفصيلها بعد وبتكون من ضمن الحائط
أرضية المكتب وصالة التلفزيون جنبه مرتفعة بس 10 سم عن أرضية البيت لذلك يقل ارتفاع الدرايش ل 250 سم والأبواب كذلك
هذي الواجهة بتكون زجاج وفريم يو بي في سي وبيكون الزجاج شفاف حتى تمتد الرؤية ليل ونهار للحديقة ولحوض السباحة القريب .. ومساحة الزجاج هنا فوق 12.5 متر مربع باخليه أغلبه ثابت فكرت في الفولدنغ بس ما يسوى الغبار والجو التعيس عندنا بابين في الأطراف وعملت حساب نص متر كتف من الصوبين للستارة تتكدس فيها من الجهتين وبتكون ستارة خفيفة مفكر في البلاستيك الشرايح الطويلة لسهولة الفتح حتى لو لافة للنور
التلفزيون بيكون مكانه يسار ووراه التجويف اللي ممكن أسوي له بروز 15 سم من تحت خشب ويكون مثل الكبت الغاطس في الحائط بعمق 20 سم وعرضه يكون 35 سم للكتب ولحفظ الوثائق والفواتير والضمانات
باكمل مع البقية بعدين
هذا قطاع في دورة مياه المكتب والمكتب جهة الشمال .. الكسرة اللي في الحمام ( الروشنة ) أفكر أسويها بكامل الإرتفاع للأرض
وهذا قطاع يبين الجدار من اي الى دي جهة المغسلة والكرسي في دورة المياه وبعدين الستور وبعدين الموزع أو المدخل اللي بيكون فيه كبت أدراج صغير أو أبواب وارفف داخل
وهنا قطاع أخير للحائط دي سي يوضح جهة الكبت في المكتب وممكن نسويه وقت الحاجة أشوف الغرف فيهم كبتات كفاية وغرف ملابس
وهذا قطاع للحائط الداحلي وأخطيت هنا والواقف يشوف هذا الحائط بيكون اف جهة اليسار وإي جهة اليمين يعني معكوس موضوعه سهل .. المكتب بيكون وسط البابين وممكن يوصل ل 3 متر كعرض
هذا تصحيح للسابق الرسم معكوس
وأحسن هشكل المكتب تحت نطلع من الباب اليسار يواجهنا الموزع بالفتحة المستطيلة بعرض 1.1 متر وندخل من الباب اليمين يقابلنا الحمام مثل ما هو موضح فوق
هذا مقترح السقف كيف بيكون لدورة المياه مع التكييف .. التكييف كله بيكون تحته مثل الحوض المعدني لجمع المياه لو صار تسريب وتنزيلها في بايب يكون ممدد في الحايط ومتجه للخارج .. وهنا عندي إمكانية أركب ثلاث وحدات تكييف ممكن وممكن ثنتين اقل شيء وحدة في دورة المياه ووحدة في الممر او الموزع أو في المخزن
وضحت المغسلة والكرسي لدورة المياه وزدت طول الكسرة .. أول شيء جهة المشاهد تجي المغسلة بعدين الكرسي وبعدين الكسرة الطولية
الخط الأحمر المتقطع هذا بايب أو قناة مرنة حق الهواء الداخل من فوق من الغرفة للحمام ومنه للخارج .. بيكون الدخول في الزاوية اليسرى فوق المغسلة والسحب في الزاوية اليمنى فوق الكرسي .. عاد أما للسقف أو جانبي هنا الجنب ميت ما فيه شيء غير زراعة
بالنسبة لمخطط السقف الجبس بيكون سيدة مع فرزة في الأطراف ما عدا دورة المياه فيها مستويين لدكت دخول الهواء المخفي وسحب الهواء كذلك مع إنارة مخفية + إنارة عامة بانل ال اي دي 60 في 60 .. أفكر فتحة التكييف وصيانته وبن بتكون لازم ينفتح الليت .. ممكن تكون فتحة الصيانة هي ال 60 في 60 ينشال الليت ويصان التكييف أو نكتفي بالإنارة المخفية + السبوتات ال 2 واحد فوق كل قطعة .. ممكن نسوي إنارة خطية بعد فوق مستوى البلاط هنا ناوي أخلي ارتفاع البلاط 2.6 متر وفوقه فاصل ستيل ممكن عمل U Channel فوق الفاصل في الجبس وفيها شريط ال اي دي مكشوف .. باوضحها في واجهة الحائط بإذن الله
المكتب الخطين الدبل جنب بعض ذيلا مكان الجبس وفوق الكبت بيكون امتداد للجبس بيكون الكبت كأنه غاطس في الحائط .. التراك لايت بيكون خطين في سقف الجبس مثل ما هو موضح والعامة هي الثلاث بانلات ال اي دي ذي مجربها في بيتي ألحين ومرتاح منهم الدرويش يجيبون جودة عالية وعمر طويل
المخزن النور المعلق حتى يكون قريب من الأرفف .. والموزع داون لايت أو أخليه مزدوج خط ال اي دي مع نور حائط كفاية وزود حتى أخلي مجال لصيانة التكييف
إضافة أخيرة للكبتات كلها نور داخلي يشتغل مع فتح الباب .. وللتجويفات كلها نور مخفي
صحيح الله يسلمك لذلك أحاول أركز على هذي المتطلبات حتى عقدي يكون واضح وبدون ربكة في الشغل وما انسى شيء .. دمج تصميم الإنترير بالتنفيذ الإنشائي
حالياً شغال على الغرفة اللي فوق المكتب وهي متكررة في الأرضي والبنتهاوس لاحظت الدرايش الثنتين حول السرير أصغرها شوي أفضل من عرض متر ل 90 سم تعطي كتف للستارة وتكون متناسبة مع فتحة المدخل .. ولو تشوف الجدران متطابقة بس دريشة المكتب عريضة وما بتتطابق مع حدود الدرايش للغرف .. المهم الجزء الظاهر الدور الأول والبنتهاوس على خط واحد وتحت ما تتلاحظ
هذي بتكون واجهة جهة السرير بالمفاسات .. أثناء تركيب الطابوق وعمل التمديدات بتكون الأمور كلها واضحة
وهذي الواجهة بالأثاث .. إحتمالية تكون الستاير طويلة ومخفية في الجبس تكون لها كسرة طويلة بعرض الحايط وممكن دكت الراجع للتكييف تكون مخفية في هذي الكسرة وسط بين الدريشتين لو يصير والدفع جدام السرير سواء بغرل مكشوف نازل أو مخفي بنفس الطريقة بس بكامل العرض
الهيد بورد بيكون منجد وثابت جلد أو قماش حسب الرغبة لراحة الإستناد وتكون التمديدات الكهربية فيه وكذلك الإنارة والتحكم فيها وبيكون مرتفع قليل عن الروشنة في الحائط والروشنة بتكون فيها انارة تحت تنور على فوق وبتكون مخفية بالهيدبورد وتشطيب الجوانب للروشنة بيكون أما خشبي في الغالب أو حتى ممكن ورق جدران بس الخشبي بيطلع أحلى مع أرفف زجاج يمر النور منها
دورة المياه عدلت عليها تعديلات بسيطة .. تختلف عن دورة مياه المكتب ذيك عرض 2.2 متر هذي 3 وممكن أسويها 3.2 فكرت فيها وسويت التصميم بس تراجعت لأن المساحة كافية .. كنت مفكر أخلي الجدار صوب الدريشة عشرين بس العمق طلع مب حلو وباخسر الروشنة الطويلة تراجعت .. ممكن أضيف روشنة في الشور على جنب الكرسي حتى تكون قريبة من الجالس وهنا بيكون الشور اليدوي للي يبي يسبح وهو جالس وفي الطرف الثاني الشور المطري والروشنة الطولية جنبه للصابون والشامبو من قريب
بعد سويت كسرة للتلفزيون بعمق 10 سم يكون غاطس فيها ما يضيق المكان ومكانه محدد في النهاية عرض الغرفة ذي 3.4 متر وحتى لو نزل العرض ل 3 متر كافي على هذا الترتيب بيكون متر كامل جدام السرير للمرور لو تمر وحدة قاطرة ومقطورة بتقدر تسلك
هذي غرفة الملابس المغلقة والخاصة صحيح بمقاس صغير بس بتخزين طولي 3.6 متر وفوق ممكن نسوي ارفف عريضة ثابتة للشناط والتخزين الطويل بس نحتاج لدرج حتى لو صغير للركوب لسحب اللي نحتاجه عندي في غرفتي هشكل .. عندنا الكبت بعد بطول 3.4 متر المجموع 7 متر المشكلة البنات بيقولون ما يكفي في وقت من الأوقات وعندنا ألحين حفيدتين الله يحفظهم لطوف وهيوه متمرسين في جمع الملابس
هذا عندك تحليل مسارات الحركة الرئيسية نسيت جهة غرفة الملابس بعد ومعاها اتصال الدرايش .. حركة الدرايش هذي شفتها كثير تنفذ في أمريكا وايد حلوة وشرحة بس هنا تعطيك امتداد للغرفة جهة الحايط