ودي ابقسك ياسلوم بدل معيض2002
ودي ابقسك ياسلوم بدل معيض2002
يا قدس يا منارة الشرائع، يا طفلة جميلة محروقة الأصابع، حزينة عيناك يا مدينة البتول، يا واحة ظليلة مرّ بها الرسول، حزينة حجارة الشوارع.. حزينة مآذن الجوامع.. فلسطين عربيّة والقدس لنا
يا ساتر.... الله ياخذك ياولد العرب الى
.
.
الصين
001
اتذكر أول مرة أختاروني إمام لصلاة التراويح اعتقد عام الاربع وتسعين بناءََ على ترشيح محفظ القرآن، ما قالوا لي لك راتب ولاشيء ونا قبلت على مضض لكن كلام المدرسين ما فيه نقاش.
صلينا ليلة ليلتين وكل الأمور تمام وذيج الليلة يصلي معنا أحد الوجهاء والظاهر ان وراه شغل ونا اعتقد طولت شوي.. عقب الركعتين قام الشايب وقعد يصارح ويتحسبن علينا وعلى اللي جابنا واتعبتونا وحنا شيبان الخ
المهم زفة محترمة ويوم خلصنا لقيته برع يحتريني؛ قلت بس كملت.. شوي الا واقف هو وواحد معه ويوم قربت الا نبرته تغيرت واعتذر مني وقال يا ولدي ما احسبك ولد فلان سامحني.. هههههه
قلت خير وانا غلطان بكرة ما ازيدكم عن ثلاث آيات؛ ولازلت اذكر زفة العم درويش لي واذكر المجاملة حسيته شال هم الوالد انه بيزعل... وهو مايدري ان الوالد يعجبه انزف. الحاصل عطوني الاوقاف 2000 ريال في ذاك الزمن تعادل 10 الاف اليوم.
وراحت الايام وبقت ذكريات وكأنو أنا مش أنا...
002
في الثلاث وتسعين كلفوني اشرح على اللوحات اللي قدمتها مدرستنا في معرض الفنون . . قلت لهم خذوا فلان اللي تعب على الجناح والتجهيز.. قالوا لا! هو يتلعثم و يرتبك نبيك أنت ؟ المهم الجناح اللي كان قبل جناح مدرستنا جابوا لوحات مميزة لكن حصل لهم ظرف ماقدروا يحضرون.
الوفد اللي من التعليم يترأسه مدير التعليم افتتحوا المعرض وتفرجوا ع الاقسام و وصلوا للمدرسة اللي قبلنا.. ما حصلوا حد يشرح وشافوني انطرهم يوصلون .. قام واحد من المرافقين .. دعاني وقال نبيك تشرح على الاعمال ذي ؟
قلت له مب تبعنا ونا مكلف بجناح مدرستنا بس؟ قال لي بنعطيك مقابل ومدير التعليم يعطيك مكافأة بعد! (مدير التعليم قاعد يسمع كلام مرافقه ويطالعني)... قلت له : والله اساتذتنا علمونا الأمانة مب اخذ الرشاوى والمفروض انت ما تقول كلامك هذا ؟
مديرنا المسكين قاعد يأشر من ورى الزوار يقول اسكت والله لا أراويك..
قاطعنا مدير التعليم وصاح (شكراً لكم ايها المعلمون لانكم اخرجتم لنا مثل هالطلاب الأمناء الخ)
كان تصرف ذكي من مدير التعليم لاحتواء الموقف .. وشكرني وشكر مدير المدرسة وقعد يتكلم شوي عن التربية
المهم اللي ذبحني ان مديرنا .. رجع يشكرني و يبرر حركاته وتلويحه بيده ههههه
( قالوا يبون طالب ما يرتبك اثناء الشرح هههههههه)
والله أنا مدري شلون كنا وشلون صرنا .. تغيرنا وتغير مجتمعنا مع اني احس ان ترسبات الماضي اثرها طويل المفعول.
التعديل الأخير تم بواسطة سالم الزهران ; 16-10-2018 الساعة 10:04 PM
003
السالفة ذي فيها جانب بوليسي شوي يمكن ما تكون مناسبة للي ابيه ينقال في هالموضوع لكن للعبرة وللظرف الراهن بكتبها..
يوم من الأيام كنت منتدب ف المطار العربستاني وصدفت واحد من زملاء المدرسة القدامى المهم الرجال خذيته المكتب وهو طبعاََ سألني عن تواجدي ويعرف اني تنقلت في كمن وظيفة.. ونا بدوري سألته وش جايبك هون ونا خابرك تشتغل بلطجي مع الحكومة الرشيدة. قال لي والله موضوع سري لكن ما عنك خافي؛ ننطر وصول شخص على طيارة بنقبض عليه.
الشخص هو زعيم حركة الشباب الصومالية، واسمه اذا تذكرون شيخ شريف وكان مسيطر ع الصومال وعليه شبه اجماع لكن أمريكا ما تبيه وهو ما يبيها.
الرجال كان بيوصل على رحلة أيرفرانس مدري من وين استقلها وجا يبي يسوي عمره... (هنا انتهت سالفة المطار وافترقنا).
انتهى انتدابي وتركت المطار ورديت لشغلي الأول.. وبعد كمن أسبوع الا أشوف طالع في الأخبار استقبال شيخ شريف على البساط الأحمر في مطار عربستان استقبال رسمي لأنه استوى رئيس الصومال بعدما تفاهم مع أمريكا؟؟ كانت شغلت رفيجي وربعة واللي مشغلهم شغلة بلطجة والحين وصلوا بالبلطجة لأعلى مستوى ويمكن نشوف سقوط نظام العصابات مالهم قريباً.. ويمكن مانشوف لأن العالم يحتضر اخلاقياََ من الأساس.... والعبرة بين انك تستقبل في صالة تشريفات أو في زنزانة هو أن تتفق مع بعض المخاليق، وسوء تقديرك للأمور هو اللي ممكن يخلي منك رئيس أو جثة تسحب في كيس! (في عالم شرير مثل عالمنا)
التعديل الأخير تم بواسطة سالم الزهران ; 18-10-2018 الساعة 11:24 AM
004 (حوار مع النفس)
س - هل أنت سلفي ؟
...نعم
س- هل ثوبك قصير؟
..... نعم
س- هل تربي لحيتك ؟
... نعم
س- هل تحافظ على صلواتك جماعة؟
( الحمدلله)
س - فلماذا تختلف مع (السلفية) إذاً ؟
حسناً... الواقع أني لا اختلف مع السلفية كمنهج ولكن مع من يتقمص السلفية ويجرد غيره منها.
س- لكن اليس جميلاً أيضاً أن تكون للسلفية حدود تميزها عن غيرها؟
بلى .. الكتاب والسنة و ليس الشيخ والمدرسة
س - اعطني مثالاً على الشيخ والمدرسة اللذان احتكرا السلفية؟
سجل عندك (الجامية)...(والمداخلة).
س - لكن منهم هؤلاء الجامية والمداخلة؟
هم مجاميع من أهل الثياب القصيرة والذقون الطويلة ( وأكرم بهما من سنة) لكن القوم يسمون أنفسهم سلفية ويسمون من خالفهم بالمبتدعة وهم أول من استعمل لفظة (حزبي - اخواني- اخونجي- سروري- حدادي ...الخ من تسميات ما أنزل الله بها من سلطان ولا أجد لهم سلفاً في هذا الا من يسمي الموحدين بالوهابية.
س- ما الخلاف أو الفروق بينكم وبين اولئك باختصار؟
الخلاف أن التبديع وتضليل الناس يجب أن يكون في الأمور التي تخالف أحكام الشريعة القطعية وليس في القضايا محل الاجتهاد .. وإن أردت أن أوصلك للعلة من أقصر الطرق .. فالمداخلة والجامية يرون أن السياسة أمر من قطعيات الشريعة لا يجوز الاجتهاد ولا الخوض فيه مطلقاً وهذا تكلف أفضى بهم الى مخالفة الكتاب والسنة وتعطيل الشريعة، على الأقل في باب الأمر بالمعروف والنهي عن المنكر ..فوقعوا فيما كانوا منه يحذرون!
س- هل يمكن التوقف عند اجابتك السابقة ومناقشتها بشيء من التفصيل؟
لا مانع ...ولنفرد لها مشاركة مستقلة في اللقاء القادم إن شاء الله.
التعديل الأخير تم بواسطة سالم الزهران ; 22-10-2018 الساعة 08:10 AM
حبيت طريقة السرد والمحتوى
متابعه لباقي الحوار ..
تُنسى ، كأنَّكَ لم تَكُنْ ..