عذاب صيدلية سدره

[معماري قطري]

يمكن مب فاضيين مشغولين مع كاس العرب

في مستشفى حكومي أمريكي في قاعدة جوية كانت صج زحمة على الصيدلية والمتقاعدين ياخذون الوصفة من برا ويصرفونها في الصيدلية وأوقات يصير تأخير حول الساعة وشوي أكثر بس زحمة صج وبالأرقام والدور ما عندهم لف ودوران .. للتكرار والأدوية الثانية تتصل وتاخذها من الدرايف ثرو بالسيارة وبسهولة لو جيت بعد موعدك والدرايف ثرو يمكن8 خراطيم وكم مسار للسيارات بحاول احط صورة لها

هذي صورة جوية للصيدلية الخارجية عن المستشفى وهي قريبة في القاعدة .. فيه سوق بعد ومطاعم كم مجمع مطاعم وفيه محطة بترول ومكان تصليح سيارات سفايف وآيل وهالسوالف محد له عذر للطلوع برا





هذي صورة مقربة لمسارات السيارات والخراطيم تبين ورا شوي معلقة تمر تحتها السيارات وتتكلم مع الموظفين بزر وميكروفون وتسلمهم بطاقتك تنشفط في الخرطوم ويردونها لك مع الدواء والعملية تاخذ دقايق ودور اللي وراك بس ضروري تتصل قبل تطلب دواك وتكون وصفتك في الكمبيوتر



عندنا مسوين في مدينة حمد الطبية في المواقف السفلية مكتب وفيه مدخل لسيارتين جنب بعض يعلمونهم بس يركبون كرسي الأطفال قلت ما تبيعون قالوا للعرض نشرح للي يبغي شلون التركيب ونركب له .. قلت زين من وين يشترون دلوني على بعض المحلات وسئلت هناك يركبون قالوا ايه .. والمكتب هذا لي حول سنتين وأكثر آمر عليه فيه وحدة كانت تكش الذبان من الملل وألحين مسكر وخارج الخدمة ليش ما يسوونه صيدلية لتسليم الأدوية حسب الطلب؟

[معماري قطري]

هذا قسم التحميل الخلفي قربته أكثر الشاحنة ترجع ريوس وتنزل .. بعضهم يكون الباب عريض وتطلع قاعدة مرتفعة بارتفاع سطح تحميل السيارة وتنزل مباشرة باليد أو عن طريق فوركلفت .. هنا المواد أصغر وأتوقع تنشال باليد وتحمل على عربات تندفع .. وهذا مستخدم عندنا في كل المحلات التجارية تقريباً لازم فيه باب للتخزين والخدمات .. الغرفة الجانبية غريبة شوي وبارزة بروز غريب هذي لحاوية القمامة ومسكرة بباب بشبك مغطى بقماش عازل للرؤية يفتحونه ويسحبون الحاوية وسيارة نقل القمامة تفضيها ويرجعونها مكانها .. شوفوا الأرضية كيف منبسطة وكيف صمموا أرضية خرسانية للتحميل والتنزيل داخل القار متحسبين أكيد للهبوط البسيط اللي ممكن يأثر في الطريق من الشاحنات الثقيلة

[معماري قطري]

تحركت شوي يمين حصلت الوولغرين وهو بعد محل مختص بعدة خدمات ما اذكرها بالضبط بس أتوقع فيه صيدلية .. الشارع النازل مسمينه ساوث ماكديل أفنيو هذا يودي حق مدخل القاعدة الجوية الجنوبي ويعتبر تجاري عليه مساحات أصغر شوي لمطاعم وكراجات ومحطات بترول وبنوك أفرع لها بس أصغر وتوزيعها توزيع مرتب مع مواقف .. هنا حددت الارض بالأحمر ومساحتها 4600 متر تقريباً مساحة محترمة إحنا عندنا بيت 1000 متر يسوي دكاكين على الشارع وخدماتها من وراء جهة البيوت ومواقف قليلة ويقولون تخطيط .. الشارع الأكبر هو اللي جدام يمين يسار أفقي وعليه القطع الأكبر والشارع النازل للقاعدة هذا في الغالب القطع أصغر

حتى كانت في المواقع القريبة ورشة تصنيع محترمة حق أجزاء الجسور الخرسانية والهولوكور صحيح قرب السكن وقرب الشارع التجاري أو الشوارع التجارية والمدارس بس لها حيز بروحها ومحاطة بسور وأشجار وشغلهم بدون ضجة وطقطقة مثل اللي عندنا

[معماري قطري]

تركيز شوي على المنطقة المقابلة عندنا من اليمين محل اسمه يوغرتولوجي هذا شكله مختص بالأسكريم ومؤكد فيه درايف ثرو ويساره بعد التقاطع عندنا السفن الفن معروف سوبرماركت كان يفتح من 7 الصبح لين 11 الليل واخترب استوى على طول فاتح وطبيعته محل صغير وفيه غالبية الإحتياجات وجدامه المظلة الصغيرة هذي محطة بترول وبترولهم شوي ارخص من البقية .. يساره مغسلة سيارات



سامحوني استرسلت شوي بس للتوضيح هذي النوعية من الشوارع والتنظيم والمحلات هي ما نحتاج له وحولهم تدخل شوي في العمق تحصل كله فرجان ومساكن هادئة ومريحة .. بيتي كان قريب من هذا الشارع وست غاندي بوليفارد يسار مسافة معتبرة وهناك فندق على الطريق وراه بمسافة منطقتنا